Սողանքները նույնպես պետք է կառավարել

Մարինա Ներսեսյանը ֆեյսբուքյան իր էջում գրում է .

Կառավարությունն իր վերջին նիստում հավանություն տվեց սողանքների տեղամասերի գույքագրման և մոնիթորինգի իրականացման մեթոդական ուղեցույցին:
Հարցը քննարկման էր ներկայացրել ՀՀ տարածքային կառավարման և արտակարգ իրավիճակների նախարարությունը: Հիմնավորման մեջ նշվում է, որ մեր երկրում շատ տարածված են սողանքային երևույթները, դրանք ունեն 3 հազարից ավելի տեղամաս: Սողանքի թիրախում են հայտնվել ավելի քան 230 բնակավայր, գյուղատնտեսական հողատեսք, տնտեսական օբյեկտ, երկաթուղի և ավտոմոբիլային ճանապարհ, ինչն ուղղակի ազդում է աղքատության և արտագաղթի վրա:

Սողանքի առաջացման թե' պատճառները, թե' կանխարգելման ու հետևանքների նվազեցման աշխատանքը բավական բազմաբնույթ է և պահանջում է գրեթե ողջ պետական կառավարման համակարգի մասնակցությունն ըստ ուղղությունների և բոլոր մակարդակներում, ինչը չէր ապահովում նախկինում գործող «Սողանքային աղետի կառավարման հայեցակարգը»:

ՀՀ կառավարության 2013թ. հուլիսի 10- ի արձանագրային որոշմամբ հավանության է արժանացել ՀՀ արտակարգ իրավիճակների նախարարության մշակած «ՀՀ սողանքային աղետի կառավարման հայեցակարգը», համաձայն որի պետական կառավարման և տեղական ինքնակառավարման մարմիններն ունեն որոշակի խնդիրներ, իսկ այդ գործընթացների համակարգողն է ՀՀ տարածքային կառավարման և արտակարգ իրավիճակների նախարարությունը:

Եվ ահա ՀՀ կառավարության 2014թ. հունիսի 31- ի որոշմամբ հաստատված ծրագրի 3- րդ կետի համաձայն մշակվել և ընդունվել է «ՀՀ սողանքների տեղամասերի մոնիթորինգի իրականացման մեթոդական ուղեցույցը, գույքագրման և բնութագրի օրինակելի ձևերը հաստատելու մասին» կառավարության որոշումը, ինչը թույլ կտա ստեղծել սողանքների միասնական տեղեկատվական բազա, անձնագրավորել սողանքային տեղամասը, մշակել երկրատեղեկատվական համակարգ, որն առավել օպերատիվ կդարձնի սողանքային աղետի կանխատեսման, կանխարգելման և հետևանքների նվազեցման միջոցառումները:
Իրավական և նորմատիվային դաշտի կատարելագործմամբ ՀՀ ՏԿԱԻՆ կողմից, շահագրգիրռ նախարարությունների և գերատեսչությունների մասնակցությամբ, կմշակվի «ՀՀ սողանքային աղետի կառավարման պլան»:

Որոշման իրականացումը հնարավորություն կտա ունենալ միասնական տեղեկատվական բազա և ստանդարտացված մոտեցումներ, ինչը կնպաստի սողանքային աղետի կառավարման մակարդակի արդյունավետության բարձրացմանը: