Գեղարքունիքում երիտասարդ կինը թողել է 4 երեխաներին եւ հեռացել. մեղադրական եզրակացություն

Գեղարքունիքի մարզի ընդհանուր իրավասության դատարանը 4 անչափահաս երեխաներից հեռանալու համար 1 տարով ազատազրկել է 36-ամյա Արփինե Ա.-ին, սակայն պատիժը պայմանականորեն չի կիրառել: Այս մասին NEWS.am-ը տեղեկացավ Դատական տեղեկատվական համակարգից:

Ըստ մեղադրական եզրակացության՝ Արփինե Ա.-ն, խնամքի տակ ունենալով 4 անչափահաս երեխա, 2014թ. սեպտեմբերից մինչեւ 2015թ. մարտի կեսերն ընկած ժամանակահատվածում, թողել է երեխաներին եւ հեռացել Գ. Հ.-ի հետ: Այս արարքով Արփինեն չի կատարել իր երեխաների դաստիարակության օրենքով նախատեսված իր ծնողական պարտականությունը։

Դատաքննության ընթացքում պարզվել է, որ Արփինեն երեխաներին թողել է ամուսնու մահից հետո եւ մի քանի ամիս բնակվել Գ.Հ.-ի հետ: Արփինեն իրեն մեղավոր է ճանաչել:

Դատարանն Արփինեին մեղավոր է ճանաչել Քրեական օրենսգրքի 170-րդ հոդվածի 1-ին մասով եւ դատապարտել ազատազրկման 1 տարի ժամկետով` առանց որոշակի գործունեությամբ զբաղվելու իրավունքից զրկելով: ՀՀ քրեական օրենսգրքի 70-րդ հոդվածի համաձայն՝ դատարանը նշանակված պատիժը պայմանականորեն չի կիրառել եւ սահմանել է փորձաշրջան 1 տարի ժամկետով:

Աղբյուրը՝ NEWS.am