Ազատ տնտեսական գոտու շահագործման նոր թույլտվություն և ակնկալիքներ

Նարեկ Սարգսյանը ֆեյսբուքյան իր էջում գրում է .

Այսօր կառավարությունը որոշում կայացրեց «ՋԻ ԴԻ ԷՄ ԴԱՅՄՈՆԴՍ» ՍՊԸ-ին «Մերիդիան» ազատ տնտեսական գոտու տարածքում 5 տարի ժամկետով շահագործողի թույլտվություն տրամադրելու մասին:
Կազմակերպությունը գործունեություն է իրականացնելու ադամանդագործության և ոսկերչության ոլորտում: Ներկայացված գործարար ծրագրի համաձայն ընկերությունը 2015-2019թթ. մտադիր է «Մերիդիան» ազատ տնտեսական գոտում ներդնել 2,7 մլն ԱՄՆ դոլար, ստեղծել 60 նոր աշխատատեղ, 25-ը ոսկերչական ոլորտում, 35-ը` ադամանդագործության:

«ՋԻ ԴԻ ԷՄ ԴԱՅՄՈՆԴՍ» ընկերությունը իր արտադրանք արտահանում է Ռուսաստան, մոտ ապագայում նախատեսվում է արտահանել Իտալիա, Թայլանդ, ԱՄԷ և ԱՄՆ:
Ընկերությունը «Մերիդիան» ազատ տնտեսական գոտում ունենալու է 3000քմ արտադրական տարածք, որից 1500քմ ադամանդի մշակման և նույնքան էլ ոսկերչական արտադրության համար:

Ընկերությունը նախատեսում է կիրառել ոսկերչական ոլորտում նորարարական տեխնոլոգիաներ, որոնք հնարավորություն կտան զգալիորեն նվազեցնել արտադրական կորստի չափերը:
Հայաստանում ազատ տնտեսական գոտիների գործունեությունը կարգավորվում է «Ազատ տնտեսական գոտիների մասին» ՀՀ օրենքով: ԱՏԳ տարածքում գործունեություն ծավալելու համար սահմանվում են ավելացված արժեքի հարկի, շահութահարկի, եկամտահարկի, գույքահարկի, մաքսային և այլ արտոնություններ:

Հայաստանոմ ազատ տնտեսական գոտիների շահագործումը կնպաստի օտարերկրյա ներդրումների, նորագույն տեխնոլոգիաների ներգրավմանը, արդյունաբերության արդիականացմանը, նոր աշխատատեղերի ստեղծմանը, աշխատուժի որակավորման բարձրացմանը և առհասարակ արդյունավետ բիզնես մշակույթի ձևավորմանը: Այն կխթանի արտահանման ծավալների աճը: