Տնտեսական ակտիվությունը 4.2%-ի է հասել. սպասելիքները ավելանում են

Blog 6 Օգոստոս, 2015 21:52

Էրիկ Մելիքյանը ֆեյսբուքյան իր էջում գրում է.

Փոխվարչապետ Վաչե Գաբրիելյանը կառավարության նիստի ժամանակ հայտնել է, որ ՀՀ տնտեսության աճի համար առկա են առողջ զարգացման միտումներ, որոնք ավելի մեծ արդյունքներ ցույց կտան տարվա երկրորդ կեսին:

Փոխվարչապետ Գաբրիելյանը նշել է՝ ԱՎԾ-ի ամփոփումը ցույց է տալիս, որ 2015թ-ի առաջին վեց ամիսներին տնտեսական ակտիվության ցուցանիշը կազմել է 4.2%: Նրա բնորոշմամբ` ամենամեծ աճն առկա է գյուղատնտեսության մեջ: «Հատկապես բուսաբուծության ոլորտում ունենք զարգացումներ: Ոլորտում ունենք բարձր բերքատվություն` կապված եղանակային պայմանների հետ, ինչպես նաև նոր հողերի օգտագործման հետևանքով։ Շինարարության ծավալը ևս 106% է: Վերջին տարիներին մեր շինարարությունը նվազում էր ու դրա պատճառներից մեկը բնակչության հաշվին կատարվող շինարությունն էր, հիմա մենք ունենք աճ, որը ևս կայուն ու ցանկալի դրսևորում է: Հանքարդյունաբերության մեջ ունենք 34%-ի աճ, որը այն պայմաններում է, որ ունենք պղնձի գների նվազում»,- հայտնել է Վ. Գաբրիելյանը:

ՀՀ եկող տրանսֆերտների ցուցանիշները փաստացի նվազել են, բայց ըստ էության չեն հակասում տնտեսության աճին, որովհետև առևտրաշրջանառության նվազումն ուղիղ համեմատական է տրանսֆերների էական նվազեցմանը:
Տրամաբանական է, որ արտաքին միջոցները, կամ, այլ կերպ ասած դրամական փոխանցումները, նկատելիորեն պակասել են, ինչը կապված է վերջին տարվա ընթացքում ՌԴ նկատմամբ պատժամիջոցների հետ, ապա ՀՀ ներքին առևտրաշրջանառության պակասելը լրիվ տրամաբանության սահմաններում է, քանի որ, ինչքան քիչ դրամական միջոցներ ու խնայողություններ է ունենում մարդը, այնքան նվազ են նրա կատարվող բոլոր ծախսերը: