Մեկնարկել է «Երևանի քաղաքապետարանը՝ Երևանի մանուկներին» բարեգործական ծրագրի հերթական տարեշրջանը

Երևանի քաղաքապետարանի և «Հայ մայրեր» հասարակական կազմակերպության կողմից համատեղ իրականացող «Երևանի քաղաքապետարանը՝ Երևանի մանուկներին» բարեգործական ծրագրի հերթական՝ հինգերորդ տարեշրջանը մեկնարկել է «Երազի տուն» վերականգնողական և զարգացման կենտրոնում: Ծրագրի հերթական փուլի մեկնարկին ներկա է գտնվել նաև Երևանի քաղաքապետարանի աշխատակազմի քարտուղարի տեղակալ Սամվել Մերթարջյանը, ով նշել է, որ, ծրագրային նորամուծություններին զուգահեռ, այս անգամ ևս կկիրառվի նախորդ տարիների հաջողված փորձը:

Հիշեցնենք, որ «Երևանի քաղաքապետարանը՝ Երևանի մանուկներին» ծրագրի շահառուներն են մանկական ուղեղային կաթված ունեցող և միայնակ մայրերի խնամքի տակ գտնվող երեխաները: Այս տարի ևս նրանք հնարավորություն կունենան «Երազի տուն» կենտրոնում անցնելու համալիր թերապևտիկ կուրսեր՝ ֆիզիոթերապիա, կինեզոթերապիա, ջրային թերապիա, արտ-թերապիա: Միաժամանակ, երեխաների առողջության վերականգնման աշխատանքներ կտանեն լոգոպեդն ու հոգեբանը: Կշարունակվի նաև երեխաների ծնողներին մատուցվող հոգեբանական ծառայությունը, որն անցյալ տարի է ներդրվել ծրագրում և արդեն ցույց է տվել իր արդյունավետությունը:

Երևանի քաղաքապետարանի տեղեկատվության
և հասարակայնության հետ կապերի վարչություն