Արա Զոհրաբյանը պարզաբանում է

ՊԱՐԶԱԲԱՆՈՒՄ

Կապված իմ 23.04.2018թ. ֆեյսբուքյան մեկնաբանության հետ որոշ գործընկերների այլ գույներով ներկայացնելու վարքագծին, ցանկանում եմ նշել հետևյալը.

17.04.2018թ. փաստաբանների պալատի կողմից կազմավորվել են փաստաբանների խմբեր բերման ենթարկվածներին անվճար առաջին իրավաբանական օգնություն ցույց տալու համար և մինչև 23.04.2018թ. այդ խմբերում ներգրավված փաստաբաններն ինտենսիվ իրավաբանական օգնություն են ցույց տվել բերման ենթարկվածներին:

20.04.2018թ. գրավոր հայտարարություն եմ ներկայացրել վերջին օրերին ծավալվող գործողությունների վերաբերյալ, որտեղ խաղաղ ցուցարարների նկատմամբ բռնություն կիրառելու և բերման ենթարկելու գործելաոճը, ինչպես նաև ցուցարարների շարքերում տեղի ունեցող որոշ քաղաքացիների սադրանքները՝ իրենց բոլոր հետևանքներով, անընդունելի համարելուց բացի անդրադարձել եմ հավաքներին անչափահասների և անգամ մանկահասակ երեխաների մասնակցության անթույլատրելիությանը։

20.04.2018թ. Հանրային հեռուստաընկերության լրատվական հաղորդման ժամանակ ներկայացրել եմ «Հավաքների մասին» ՀՀ օրենքի վերաբերյալ մեկնաբանությունները, այդ թվում՝ անդրադարձել եմ խաղաղ հավաքի ժամանակ ոստիկանության աջակցության պարտականությանը, ինչպես նաև կրթական հաստատություններից փոքրահասակներին հավաքների տանելու անթույլատրելիությանը։

21.04.2018թ. Փաստաբանների պալատը խստորեն դատապարտել է փաստաբան Ավագ Լալայանի նկատմամբ բռնություն կիրառելու և նրա մասնագիտական գործունեությանը խոչընդոտելու դեպքը:

22.04.2018թ. ֆեյսբուքյան կարծիք եմ ներկայացրել «Պետք է կանխել բախումները» վերնագրով, որտեղ կրկին ներկայացրել եմ «Հավաքների մասին» ՀՀ օրենքի մեկնաբանություններ, այդ թվում կրկին նշել եմ՝ խաղաղ բնույթի հավաքներին ոստիկանության աջակցության պարտականությունը:

23.04.2018թ. ՀՀ փաստաբանների պալատի խորհուրդը միաձայն որոշել է՝
- Խստորեն դատապարտել նման (հետաքննության և նախաքննության մարմինների փաստաբանների գործունեությանը խոչընդոտելու և անազատության մեջ գտնվող քաղաքացիներին փաստաբանի օգնությունից հրաժարվելու հորդորները) իրավախախտման դեպքերը և կոչ անել իրավասու մարմիններին՝
1) ապահովել բերման ենթարկված հավաքի մասնակիցների՝ փաստաբանների միջոցով իրավաբանական օգնություն ստանալու անօտարելի իրավունքի պատշաճ իրացումը,
2) ազատությունից զրկված անձանց, այդ թվում՝ ԱԺ պատգամավոր Նիկոլ Փաշինյանին ապահովել՝ այդ մասին անհապաղ իր ընտրած անձին տեղեկացնելու և իրավաբանական օգնություն ստանալու անօտարելի իրավունքների իրացումը։

Ամփոփելով վերոգրյալը հայտնում եմ, որ՝
- Այս պահին էլ պնդում եմ բոլոր օրերին իմ կողմից ներկայացված փաստարկները և մեկնաբանությունները: Դրանք չեն փոխվել ու չեն կարող փոխվել որևէ քաղաքական իրավիճակից ելնելով:
- Այս պահին էլ գտնում եմ, որ նշված հարցի լավագույն լուծումը երկխոսության ուղին է, առանց բախումների: