Փաշինյանը հայտարարեց ապրիլի 29-ից զանգվածային անհնազանդության ակցիաները վերսկսելու մասին

Ազգային ժողովի «Ելք» խմբակցության ղեկավար Նիկոլ Փաշինյանը հայտարարեց ապրիլի 29-ից հանրապետության ողջ տարածքում զանգվածային անհնազանդության ակցիաները վերսկսելու մասին: Ինչպես հաղորդում է «Արմենպրես»-ը, Գյումրիում կայացած հանրահավաքի ընթացքում Նիկոլ Փաշինյանը հավաքվածներին ներկայացրեց իրենց առաջիկա անելիքները: «Այսօր և վաղը ողջ հանրապետության տարածքում դադարեցրել ենք քաղաքացիական անհնազանդության գործողությունները: Դա արել ենք երկու պատճառով. առաջին՝  որպեսզի մեր շարժման մասնակիցները երկու օր հանգստանալու հնարավորություն ունենան, որովհետև նրանք այդ իրավունքը վաստակել են, երկրորդ՝ եթե ճանապարհները փակ լինեին,  մենք այսօր ո՞նց էինք Գյումրի գալու: Այսօր մեր հիմնական միջոցառումը տեղի է ունենում Գյումրիում, վաղը տեղի կունենա Վանաձորում, և այս ընթացքում մեր բոլոր գործողությունները դադարեցված են: Բայց ապրիլի  29-ից բոլոր գործողությունները սկսվում են կրկնակի թափով և կրկնակի ծավալներով, իսկ մայիսի 1-ին, առավոտյան ժամը  08:00-ին բոլորս հեղեղում ենք Երևան մայրաքաղաքի փողոցները և հրապարակները»,-  նշեց Նիկոլ Փաշինյանը:

Նա նշեց, թե իր մոտեցմամբ՝  խնդիրը նրա մեջ չէ, այլ իր բնորոշմամբ ժողովրդի թեկնածուին վարչապետ ընտրելը:  Նրա խոսքով՝ այդ հարաբերակցությունը պետք է արձանագրվի մայիսի 1-ին Ազգային ժողովում կայանալիք վարչապետի ընտրություններում: Նիկոլ Փաշինյանը նշեց, որ ժողովրդի թեկնածուին վարչապետի պաշտոնում պետք է առաջադրեն խորհրդարանի բոլոր խմբակցությունները: Նա այն կարծիքին է, որ մնացած բոլոր լուծումներն ավելի են խորացնելու առկա ճգնաժամը:

Փաշինյանն անդրադարձավ նաև կարծիքներին, թե իր նախաձեռնած շարժումը քաղաքական, տնտեսական, աշխարհաքաղաքական պատերազմներ են մղելու Ռուսաստանի դեմ: Նա շեշտեց, որ իրենք երկրի թշնամին չեն, որպեսզի Հայաստանը տանեն ոչ խելամիտ ու արկածախնդիր ճանապարհով: «Մենք երբեք չենք ասել և չենք ասում, որ Հայաստանը պետք է դուրս գա Հավաքական անվտանգության պայմանագրի կազմակերպությունից: Մենք գտնում ենք, որ Հայաստանը պետք է շարունակի անդամակցել այդ կազմակերպությանը,  որովհետև դա բխում է Հայաստանի Հանրապետության ազգային շահերից»,- ասաց Փաշինյանը՝ հավելելով, որ Հայաստանը պետք է շարունակի հավատարիմ մնալ իր միջազգային պարտավորություններին՝ ներառյալ Եվրոպական Միության հետ ստորագրված համաձայնագիրը և Եվրասիական տնտեսական միության պայմանագիրը:

Հանրահավաքից հետո մասնակիցները երթ իրականացրեցին Գյումրիի փողոցներում:

Մանրամասները՝ այստեղ

Այս թեմայով Գագիկ Ծառուկյանը հանդիպել է Նիկոլ Փաշինյանի հետ Ինչքան երկարում է այս պրոցեսը, այդքան հայտնի է դառնում Հայաստանն աշխարհում ու շուտով կդառնա աշխարհի իդեալը. Նիկոլ Փաշինյան Իշխանությունը ճամպրուկ չէ. Ռոբերտ Քոչարյանը կարծում է, որ Փաշինյանը քաղաքական շանտաժ է արել (տեսանյութ) Տեսեք ով հենց նոր ժամանեց Միացյալ նահանգներից, որպեսզի սատարի Նիկոլ Փաշինյանին ՆԻկոլ Փաշինյանի եզրափակիչ ելույթը...