Շուտով կմեկնարկի լիզինգի նոր ծրագիր. շահառուները կկարողանան ջերմոցներ հիմնել. Նախարար

ՀՀ գյուղատնտեսության նախարար Արթուր Խաչատրյանը նախօրեին ընդունել է «Ջերմատնային ասոցիացիա» գյուղատնտեսական ՀԿ-ի նախագահ Արտավազդ Խաչատրյանին, տնօրեն Պողոս Գեւորգյանին, Հայաստանի ագրոարդյունաբերական համակարգի աշխատողների արհեստակցական կազմակերպությունների  ճյուղային հանրապետական միության փոխնախագահ Տիրուհի Նազարեթյանին։

Գյուղնախարարությունից NEWS.am-ին հայտնում են, որ հանդիպումը նպատակ ուներ լսել փոքր եւ միջին ջերմոցային տնտեսությունների կողմից բարձրացվող  հարցերը եւ քննարկել  նրանց մրցունակության բարձրացմանն ու զարգացմանն ուղղված  առաջարկները։ Հանդիպմանը մասնակցում էին ՀՀ գյուղատնտեսության  նախարարի տեղակալ Ռոբերտ Մակարյանը, էներգետիկ ենթակառուցվածքների եւ բնական պաշարների նախարարության էներգետիկայի վարչության պետ Հայկ Բադալյանը,  այլ պատասխանատուներ։

Գյուղատնտեսության նախարարը տեղեկացրել է ներկաներին, որ մշակվել է լիզինգի նոր ծրագիր, որի շրջանակում շահառուները շուտով հնարավորություն կունենան նաեւ ջերմոցներ հիմնել եւ  ժամանակակից սարքավորումներ ներդնել մատչելի պայմաններով՝ տարեկան ընդամենը 4 %  լիզինգային տոկոսադրույքով։ Ծրագիրը նախատեսվում է  մեկնարկել կառավարության կողմից հավանության արժանանալուց հետո՝  հունիս-հուլիս ամիսներին։

Հանդիպման մասնակիցները մասնավորապես առաջ են քաշել բնական գազի դիմաց  տարաժամկետ վճարման,  լեռնային եւ նախալեռնային շրջաններում՝ պայմանավորված ջեռուցման առավել երկար ժամանակահատվածով  իջեցված սակագնի վճարման  ժամկետի երկարաձգման եւ այլ հարցեր։

Էներգետիկ ենթակառուցվածքների եւ բնական պաշարների նախարարության ներկայացուցիչը հորդորել է մշակել առաջարկների փաթեթ եւ ներկայացնել ՀՀ հանրային ծառայությունները կարգավորող հանձնաժողովի քննարկմանը՝ պատրաստակամություն հայտնելով աջակցություն ցուցաբերել։