Նեթանյահուն հետաձգել է Հայոց ցեղասպանության ճանաչման օրինագծի քննարկումները մինչեւ Թուրքիայում ընտրությունների ավարտը

Իսրայելի վարչապետ եւ արտաքին գործերի նախարար Բենիամին Նեթանյահուն ընդունել է երկրի արտաքին գործերի նախարարության հանձնարարականը Հայոց ցեղասպանության ճանաչման օրինագծի շուրջ Կնեսեթում քննարկումները մինչեւ Թուրքիայում հունիսի 24-ին նշանակված  արտահերթ խորհրդարանական ընտրությունների ավարտը հետաձգելու մասին։ Այս մասին նշված է Իսրայելի ԱԳՆ մամուլի ծառայության տարածած կոմյունիկեում։

«Վարչապետ Նեթանյահուն ընդունել է ԱԳՆ հանձնարարականը Հայոց ցեղասպանության մասին օրենքի հարցով խորհրդարանական քննարկումները մինչեւ Թուրքիայում հունիսի 24-ին նշանակված արտահերթ խորհրդարանական ընտրությունների ավարտի պահը տեղափոխելու մասին, քանի որ այդ հարցի քննարկումները նախապես նշանակված օրը կարող են օգտագործվել Թուրքիայի նախագահ Ռեջեփ Թայիփ Էրդողանի նախընտրական քարոզարշավում»,-նշված է փաստաթղթում։

Իսրայելական Kan պետական ռադիոյի տվյալներով, հարցի քննարկումը նախատեսված էր հունիսի 3-ին։

Մայիսի 23-ին Կնեսեթը հավանություն էր տվել Հայոց ցեղասպանության ճանաչման հարցով լիագումար քննարկում անցկացնելու առաջարկին։ Առաջարկին կողմ էին քվեարկել Իսրայելի խորհրդարանի 120 պատգամավորներից 16 պատգամավոր, իսկ 10-ն էլ դեմ էին քվեարկել։ Այդ քննարկման նախաձեռնողն էր դարձել «Մերեց» ուլտրաձախ ընդդիմադիր կուսակցության առաջնորդ Թամար Զանդբերգը։