Զարգացումները ցույց են տալիս, որ Արցախի ժողովուրդը ցուցաբերում է բարձր գիտակցություն. ՀՀ նախագահ

Հանրապետության նախագահը ողջունում է Արցախի նախագահ Բակո Սահակյանի հետ ձեռք բերված պայմանավորվածությունների եւ Հայաստանի վարչապետի հորդորի հիման վրա Ստեփանակերտում բողոքի գործողությունների դադարեցումը: Այս մասին «168 ժամ»-ին հայտնել է ՀՀ նախագահ Արմեն Սարգսյանը՝ անդրադառնալով Ստեփանակերտում տեղի ունեցած բողոքի գործողություններին:

«Նախագահ Սարգսյանն ամենօրյա կապի մեջ է Արցախի նախագահի հետ, ստեղծված իրավիճակի շուրջ խորհրդակցում է նաեւ Արցախի նախկին ղեկավարության եւ հեղինակավոր մարդկանց հետ:

Նախագահը գոհունակություն է հայտնում, որ Արցախի իշխանություններն արագ արձագանքեցին ցավալի միջադեպին, այն դատապարտվեց, որակվեց անթույլատրելի եւ ստացավ իրավական գնահատական: Արցախի Ազգային ժողովում ստեղծվեց քննիչ հանձնաժողով ստեղծված վիճակի մասին համապարփակ քննարկումների հարցերով:

Միջադեպի շուրջ ծավալված զարգացումները ցույց են տալիս, որ Արցախի ժողովուրդը ցուցաբերում է քաղաքական եւ քաղաքացիական բարձր գիտակցություն:

Նախագահը կիսում է այն գնահատականը, որ Արցախի համար բացառիկ արժեքներ են ներքին կայունությունը, պետական հիմքերի անսասանությունը, երկրի անվտանգության եւ պաշտպանողունակության հետեւողական բարձրացումը, որին հնարավոր է հասնել Արցախի բնակիչների աշխատանքի եւ կյանքի խաղաղ պայմանների ապահովման եւ կենսապայմանների բարելավման նպատակով սոցիալ-տնտեսական հարցերի լուծման միջոցով»,-ասված է հաղորդագրությունում: 

Ավելի վաղ NEWS.am-ը հայտնել էր, որ անցած օրերին ցուցարարները Ստեփանակերտում փակում էին Ազատամարտիկների փողոցը, պահանջելով ԼՂ ուժային կառույցների՝ բացի Պաշտպանության բանակից, ղեկավարների հրաժարականը։ Բողոքի ակցիաները հաջորդել են քաղաքացիների և ԱԱԾ աշխատակիցների միջև հունիսի 1-ին տեղի ունեցած ծեծկռտուքին: Ըստ ԼՂ ոստիկանության, վիճաբանության ընթացքում կողմերը փոխադարձ հարվածներ են հասցրել միմյանց՝ պատճառելով մարմնական վնասվածքներ:

Հունիսի 3-ի երեկոյան Լեռնային Ղարաբաղի նախագահ Բակո Սահակյանը հանդիպել էր ցուցարարների վեց հոգանոց խմբի հետ, և, ինչպես այսօր խմբի անդամները փոխանցել են փողոցում հավաքվածներին, նախագահն ասել է, թե պատրաստ է գնալ պաշտոնանկությունների, բայց կոնկրետ ժամկետներ չի նշել:

Արդեն երեկ երեկոյան Հայաստանի վարչապետը կոչ արեց դադարեցնել բողոքի ցույցերը Լեռնային Ղարաբաղում:

Նշենք, որ Արցախի պաշտպանության նախարարությունը հորդորել էր «զերծ մնալ ներքաղաքական իրավիճակն արհեստականորեն սրելու վտանգավոր քայլերից և հարցի հանգուցալուծումը դիտարկել բացառապես իրավական հարթությունում»: