Մեկը կրակել է, մյուսը՝ դանակահարել. մանրամասներ «Դիվա» գիշերային ակումբի մոտ տեղի ունեցած միջադեպից

Ոստիկանությունը մանրամասներ է հայտնել հունիսի 23-ին Բագրեւանդի փողոցում գտնվող «Դիվա» գիշերային ակումբի մոտ տեղի ունեցած ծեծկռտուքի եւ կրակոցների մասին:

Ոստիկանության տարածած հաղորդագրության մեջ ասվում է. «հունիսի 23-ին, ժամը 7.00-ին «Սուրբ Գրիգոր Լուսավորիչ» բժշկական կենտրոնից ոստիկանության Նոր Նորքի բաժին հաղորդում է ստացվել, որ «կրծքավանդակի ծակած-կտրած վերքեր» ախտորոշմամբ բուժօգնության են տեղափոխվել 34-ամյա Հ․ Վարդանյանը եւ 27-ամյա ծնված Յ․ Փուրթոյանը։

Բժշկական կենտրոն մեկնեց օպերատիվ խումբը։ Ըստ բժշկի տեղեկանքի` Հ.Վարդանյանը եւ Յ.Փուրթոյանն ի վիճակի չէին բացատրություն տալու:

Ոստիկանության Նոր Նորքի քրեական հետախույզների ձեռնարկված օպերատիվ-հետախուզական միջոցառումների արդյունքում պարզվեց, որ նույն օրը, ժամը 6.00-ից 6.30-ն ընկած ժամանակահատվածում, Բագրեւանդի փողոցում գտնվող գիշերային ակումբի մոտ ծագած վիճաբանության ժամանակ 25-ամյա Գ․ Գալստյանը իր մոտ եղած «ԲՌՈւՆՈ» տիպի, 9 մմ տ/չ ատրճանակով կրակոցներ է արձակել, իսկ 29-ամյա Մ․ Դեմուրչյանը կտրող-ծակող գործիքով հարվածել է Հ.Վարդանյանին եւ Յ.Փուրթոյանին` պատճառելով մարմնական վնասվածքներ:

Նույն օրը առավոտյան, գիշերային ակումբի մոտից մարմնական վնասվածք պատճառելու կասկածանքով Գ.Գալստյանը բերման է ենթարկվել, իսկ Մ.Դեմուրչյանը՝ տարված բացատրական աշխատանքների արդյունքում, ժամը 20։30-ին, ներկայացել է ոստիկանության Նոր Նորքի բաժին եւ տվել խոստովանական բացատրություն:

Ատրճանակն առգրավվել է: Ձեռնարկվում են միջոցառումներ հանցագործության մյուս գործիքը հայտնաբերելու ուղղությամբ:

Նշանակվել են դատաձգաբանական եւ դատաբժշկական փորձաքննություններ:

Կատարվում է նախաքննություն:

Ավելի վաղ NEWS.am-ը հայտնել էր, որ Երեւանի Բագրեւանդ թաղամասում գտնվող «Դիվա» գիշերային ակումբում հունիսի 23-ին, լուսադեմին ծեծկռտուք է տեղի ունեցել. կան տուժածներ: Ժամը 07.00-ին հիվանդանոցից հաղորդում են ստացել, որ «կրծքավանդակի ծակած-կտրած վերքեր» ախտորոշմամբ իրենց մոտ 2 երիտասարդ է տեղափոխվել, որոնք ըստ բժշկի, ի վիճակի չեն բացատրություն տալու: