Մեզ պետք չեն իր ներողությունները. Դատավորը՝ Անի Երանյանի մասին

NEWS.am-ը գրում է.

Դերասանուհի Անի Երանյանի մասնակցությամբ տեղի ունեցած վթարից տուժած  Կենտրոն եւ Նորք-Մարաշ վարչական շրջանների ընդհանուր իրավասության առաջին ատյանի դատարանի դատավոր Գագիկ Պողոսյանը դեռ ցավեր ունի ստացած սալջարդներից, իսկ կնոջն էլ վիրահատել են: Այս մասին NEWS.am-ի թղթակցի հետ զրույցում ասաց Գագիկ Պողոսյանը:

Նա նշեց, որ կնոջ մոտ խնդիրներ են առաջացել ոտքի հետ կապված, արյունը չէր ներծծվում, այդ պատճառով վիրահատել են: Դատավորի կինն արդեն դուրս է գրվել հիվանդանոցից, բայց դեռ լիարժեք չի կարողանում քայլել, պետք է ոտքը չծանրաբեռնի, որպեսզի հետագայում խնդիրներ չլինեն, լիարժեք ապաքինման համար դեռ ժամանակ է  հարկավոր:

Ինչ վերաբերում է Toyota Land Cruiser մակնիշի նոր մեքենա ձեռք բերելուն, դատավորն ասաց, որ լրատվամիջոցներում տարածված լուսանկարի մեքենան իրենը չէ, վարում է հարազատի մեքենան: Իսկ վթարի ենթարկված իր Mercedes ML մակնիշի մեքենան վերականգնման ենթակա չէ, նա մտադիր է այն վաճառել եւ նոր մեքենա գնել:

Հարցին, թե արդյոք դերասանուհի Անի Երանյանը կապ հաստատել է իրենց հետ, հանդիպել կամ զրուցել, դատավորն ասաց հետեւյալը. «Մեզ պետք չեն իր ներողությունները, մենք շատ լավ կզգայինք, եթե զանգեր ու ասեր՝ տիկին, ինչպե՞ս եք, ի վերջո իմ պատճառով երեք շաբաթ դուք հաշմանդամ էիք»: Դիտարկմանը, թե զղջում եք, որ բողոք չէր ներկայացրել դերասանուհու դեմ, Գագիկ Պողոսյանն ասաց, որ երբեք իր արածների համար չի ղջում:

Հիշեցնենք, որ դերասանուհի Անի Երանյանը 2015թ. հուլիսի 18-ին իր վարած «Հունդայի» մակնիշի մեքենայով վթարի է ենթարկվել Գեղարքունիքի մարզի Ճամբարակից դեպի Սեւանի մայրուղի տանող ճանապարհին: Դերասանուհին վնասվածքներով տեղափոխվել էր Սեւանի բժշկական կենտրոն: Հիվանդանոց էր տեղափոխվել նաեւ նրա մեքենայի ուղեւոր Հայկ Մխիթարյանը, Իզաբելա Դանիելյանը:

Ավտովթարի հետեւանքով տուժել էր նաեւ Երեւանի Կենտրոն եւ Նորք-Մարաշ վարչական շրջանների ընդհանուր իրավասության դատավոր Գագիկ Պողոսյանը, նրա կինը՝ Մարինե Կարապետյանը, նրանք եւս դիմել էին հիվանդանոց:

Հուլիսի 31-ին Քննչական կոմիտեն մերժել էր դեպքի առթիվ քրեական գործի հարուցումը բողոքի բացակայության պատճառաբանությամբ: