«Երևան-Սոֆիա». Հայ-բուլղարական երգարանի շնորհանդես՝ նվիրված Երևանի 2800-ամյակին

Yerevan2800.am-ը գրում է.

Բուլղարիայում ՀՀ դեսպանության և Սոֆիայի հայկական կազմակերպությունների խորհրդի աջակցությամբ Սոֆիայի Հայոց տանը կայացել է Երևանի Կոմիտասի անվան պետական կոնսերվատորիայի դասախոս Մուշեղ Հարությունյանի հեղինակած «Երևան-Սոֆիա» հայ-բուլղարական երգարանի շնորհանդեսը՝ նվիրված Երևանի հիմնադրման 2800-ամյակին և Հայաստանի Հանրապետության ու մայիսյան հերոսամարտերի 100-ամյակին:

«Արմենպրեսի» փոխանցմամբ, շնորհանդեսին մասնակցել են բուլղարահայ համայնքի ներկայացուցիչներ, հայկական և բուլղարական արվեստի և մշակույթի գործիչներ, հայտնի երաժիշտներ, Բուլղարիայի կոմպոզիտորների միության անդամներ, գիտական գործիչներ, լրագրողներ: Հրավիրվածների թվում էին Բուլղարիայի ազգային և Սոֆիայի քաղաքային գրադարանների ղեկավարները: Միջոցառմանը ներկա էր նաև ԲՀ նախկին վարչապետ, հայ համայնքի մեծ բարեկամ Ռենետա Ինջովան:

Շնորհանդեսի մասնակիցներին ողջույնի խոսքով դիմել է Բուլղարիայում ՀՀ դեսպան Արմեն Սարգսյանը: Նա հույս է հայտնել, որ երգարանը լավագույնս կնպաստի հայ և բուլղարացի ժողովուրդների միջև մշակութային կապերի ամրապնդմանն ու բուլղարահայության ազգային ինքնության պահպանմանը:

Իր ելույթում Մուշեղ Հարությունյանը նշել է, որ երգարանը կազմելիս առաջնորդվել է երգարվեստի միջոցով երկու ժողովուրդների միջև բարեկամական կապերի ամրապնդման անհրաժեշտության գաղափարով:

Միջոցառման ընթացքում Հարությունյանի և բուլղարահայ հայտնի երգիչ և կոմպոզիտոր Հայկաշոտ Աղասյանի կատարմամբ հայերեն և բուլղարերեն լեզուներով հնչել են երգարանում ներառված և երկու ժողովրդի կողմից սիրված մի շարք երգեր:

Մուշեղ Հարությունյանի «Երևան-Սոֆիա» հայ-բուլղարական երգարանը կտրամադրվի Բուլղարիայի ազգային և տեղական գրադարաններին, կոմպոզիտորների միությանը, երկրի մշակութային օջախներին, ինչպես նաև բուլղարահայ համայնքային կազմակերպություններին:

«Երևան 2800» հիմնական տոնական միջոցառումներն այս տարի կանցկացվեն սեպտեմբերի 29-30-ին: Հետևեք տոնական միջոցառումներին ու դրանց մասին տեղեկատվություն ստացեք Yerevan2800.am-ից: