Ռուսաստանում հոր դաժան սպանության համար կասկածվող Խաչատուրյան քույրերն ուսումը կշարունակեն բանտում ու կկարողանան քննություն հանձնել

Հուլիսի 27-ին Մոսկվայում 57-ամյա Միխայիլ Խաչատուրյանի դաժան սպանության համար կասկածվող դուստրերը՝ 17, 18, 19 տարեկան Մարիա, Անգելինա, Կրիստինա Խաչատուրյանները, որոնք այժմ գտնվում են քննչական մեկուսարանի տարբեր խցերում, կկարողանան շարունակել ուսումը, պետական միասնական քննություն հանձնել ու ատեստատ ստանալ:

Ինչպես նշում է kp.ru-ն, Մարիան և Անգելինան նույն դասարանում են սովորել, սակայն դպրոցն ավարտելու հնարավորություն չեն ունեցել, քանի որ հայրը թույլ չի տվել դասի գնալ: Տևական բացակայությունների պատճառով աշակերտուհիներին թույլ չեն տվել մասնակցել միասնական պետական քննություններին ու ատեստատ ստանալ:

«Թիվ 6 քննչական մեկուսարանում պահվում են անչափահասներ, ուստի՝ մեկուսարանը պայմանավորվել է դպրոցի հետ, որ քույրերը կարողանան շարունակել ուսումը՝ թեկուզ բանտի պատերից ներս:

Նա նաև պատմել է, որ աղջիկները դժգոհում են իրարից անջատ լինելու ու տարբեր խցերում գտնվելու փաստից, քանի որ սովոր են միշտ միասին լինել, ու հիմա իրար կարոտում են:

Հայտնի է, որ մեկուսարանում, որտեղ պահվում են միայն իգական սեռի ներկայացուցիչներ, քույրերը մնալու են մինչև սեպտեմբերի 28-ը:

Հիշեցնենք, որ դաժան սպանությունը տեղի էր ունեցել հուլիսի 27-ին՝ Մոսկվայում: Հարազատ քույրերը, այլևս չդիմանալով հոր՝ իրենց նկատմամբ դաժան ու կոպիտ վերաբերմունքին, դանակով բազմաթիվ հարվածներ են հասցրել նրան:

Ձերբակալությունից հետո քույրերը խոստովանել են, որ հայրը տարիներ շարունակ տանջել է իրենց, ստորացրել ու սեռական բնույթի գործողությունների դրդել: Մոսկվայի Օստանկինյան դատարանը որոշել է խստացնել Խաչատուրյան քույրերի դեմ մեղադրանքը: Նախկինում քույրերին սպառնում էր մինչև 15 տարվա ազատազրկում՝ «Սպանություն՝ առանց ծանրացուցիչ հանգամանքների» հոդվածով, մինչդեռ հավելյալ նյութերի քննության արդյունքում մեղադրանքը խստացվել է, և այժմ նրանց սպառնում է մինչև ցմահ ազատազրկում: Սակայն քույրերից կրտսերն անչափահաս լինելու պատճառով չի կարող ազատազրկվել 10 տարուց ավելի ժամկետով: 

Քույրերը հարցաքննության ժամանակ ընդունել են իրենց մեղքը՝ մանրամասնելով, որ հայրը տարիներ շարունակ տանջել է իրենց: Աղջիկները պատմել են, որ հայրն իրենց թույլ չէր տալիս ուսումը շարունակել: Նրանց խոսքով՝ հայրը տանն իսկական զինանոց ուներ ու անընդհատ սպառնում էր իրենց: Աղջիկների պնդմամբ՝ հայրն ուզում էր, որ իրենք անընդհատ իր կողքին լինեին ու իրենց փաստացի օգտագործում էր տնային ստրուկների պես:

Հարևաններն ու աղջիկների ընկերները պատմել են, որ հայրն իրեն պահում էր իսկական բռնապետի պես, հաճախ էր ցասման նոպաներ ունենում: Հատկանշական է, որ բոլոր հարցվածները քույրերի մասին միայն դրական բաներ են պատմել՝ նրանց բնութագրելով որպես համեստ, բարեհամբույր և հաշտ քույրեր: Աղջիկներից մեկի ծանոթի պատմելով՝ քույրերը երբեք միայնակ տնից դուրս չէին գալիս: Հայրը նրանց կարող էր ծեծել ամենաչնչին բանի համար: