Թրամփը երդմնակալության ժամանակ ցանկացել է Աստվածաշնչի փոխարեն երդվել իր «Գործարքի արվեստը» գրքի վրա

ԱՄՆ նախագահ Դոնալդ Թրամփը ցանկանում էր անցած տարի կայացած երդմնակալությանը երդում տար՝ ձեռքը դնելով ոչ թե Աստվածաշնչի վրա, ինչպես դա պահանջում է ավանդույթը, այլ իր գրած «Գործարքի արվեստը» (The Art of the Deal) գրքի վրա: Այդ մասին հայտնել է Slate-ը:

Լրատվամիջոցը ներկայացրել է Սպիտակ տան՝ հասարակական կազմակերպությունների և բնակչության հետ կապերի հարցերով նախկին ղեկավար Օմարոսա Մանիգոլտ-Նյումանի հեղինակած, այժմ հրատարակման պատրաստվող գրքից հատվածներ: Նյումանը համարվում էր Թրամփի մերձավորներից մեկը: Ինչպես նա պնդում է, 2017 թվականի հունվարի 20-ին Վաշինգտոնում կայացած երդմնակալությունից առաջ Թրամփը հայտարարել է, որ կցանկանար արարողության ժամանակ երդվել բեսթսելլեր դարձած իր գրքի վրա:

Մանիգոլտ-Նյումանի խոսքերով՝ Թրամփը հարցրել է, թե ինչ է նա կարծում այդ մասին:

«Սա պատմության մեջ բիզնեսի մասին մեծագույն գիրքն է»,- Թրամփի խոսքերն է գրքում մեջբերում Մանիգոլտ-Նյումանը: Նրա խոսքերով՝ Թրամփն ասել է, որ դա կխորհրդանշի այն, որ նա պատրաստվում է «հիանալի գործարքներ կնքել երկրի համար»: Նա նաև ենթադրել է, որ դա է՛լ ավելի կխթանի գրքի վաճառքը, պնդում է նախագահի նախկին օգնականը:

Արդյունքում՝ Թրամփին հաջողվել է համոզել երդմնակալության ժամանակ օգտագործել Աստվածաշունչը: Հետագայում նա հայտարարել է, որ կատակում էր, սակայն, Մանիգոլտ-Նյումանի խոսքերով, նա գիտեր, որ Թրամփն այդ ժամանակ լուրջ էր առաջարկում այդ միտքը, գրում է Slate-ը:

«Գործարքի արվեստը» գիրքը լույս է տեսել 1987 թվականին: Թրամփն այն գրել է լրագրող Թոնի Շվարցի հետ միասին: