Ռուսաստանի ԱԳՆ-ն պատասխանել է Սոլսբերիում քիմիական զենք կիրառելու վերաբերյալ ԱՄՆ-ի մեղադրանքներին

Ռուսաստանի արտգործնախարարությունը հայտարարություն է հրապարակել Ռուսաստանի դեմ ամերիկյան նոր պատժամիջոցների առնչությամբ, հայտնում է gazeta.ru-ն՝ վկայակոչելով գերատեսչության կայքը:

ԱԳՆ-ում նշել են, որ Պետքարտուղարությունը նախընտրում է արհամարհել այն փաստը, որ Ռուսաստանն ավարտել է քիմիական զենքի ոչնչացման ծրագիրը, և դա տեղի է ունեցել Քիմիական զենքի արգելման կոնվենցիայի համապատասխան՝ միջազգային վերահսկողությամբ:

Հաղորդագրությունում նաև ընդգծվում է, որ Մոսկվան անգլիական Սոլսբերիում տեղի ունեցած միջադեպին ներգրավվածության մասին ԱՄՆ-ի մեղադրանքները դիտարկում է որպես միջազգային պարտավորությունները չկատարելու առնչությամբ Ռուսաստանին անպատասխանատու ներկայացնելու փորձ:

«Հարցը նման կերպով դնելը է՛լ ավելի երկերեսանիություն է՝ հաշվի առնելով, որ հենց ԱՄՆ-ն չի շտապում ոչնչացնել քիմիական զենքի իր զինանոցը և մնում է Քիմիական զենքի արգելման կոնվենցիայի միակ մասնակից երկիրը, որ մարտական թունավոր նյութերի զգալի պաշարներ ունի»,- նշել են ԱԳՆ-ում:

Օգոստոսի 8-ին ԱՄՆ վարչակազմը հայտարարել է Ռուսաստանի դեմ նոր պատժամիջոցների մասին՝ բրիտանական Սոլսբերի քաղաքում քիմիական զենք կիրառելու համար: NBC հեռուստաալիքի աղբյուրների տվյալներով՝ պատժամիջոցների առաջին փաթեթը ենթադրում է ՌԴ էլեկտրոնային սարքերի և երկակի օգտագործման համար նախատեսված պարագաների արտահանման արգելք, երկրորդ փաթեթը կարող է ներառել դիվանագիտական հարաբերությունների մակարդակի նվազեցում, ԱՄՆ «Աերոֆլոտ»-ի թռիչքների արգելք և ամերիկյան արտահանման գրեթե ամբողջական դադարեցում: Ռուսաստանը կարող է խուսափել պատժամիջոցների երկրորդ ալիքից, եթե երաշխավորի ապագայում քիմիական զենքի չկիրառումը:

Բացի այդ, ամերիկյան Կոնգրեսում Ռուսաստանի դեմ նոր պատժամիջոցների վերաբերյալ օրինագիծ է ներկայացվել, որով ենթադրվում են պատժամիջոցներ ՌԴ բանկային հատվածի դեմ: