Բաքվում դոլարներ են այրել հաջակցություն Թուրքիայի (տեսանյութ)

Բաքվում Թուրքիայի դեսպանատան առաջ թուրքական տնտեսությանն աջակցող ակցիա է անցկացվել, գրում է oxu.az-ը։ Ակցիային մասնակցել են «Պատերազմի վետերանների Բաքվի խորհրդի» և «Օսմանյան վերածննդի ազգային շարժման» ներկայացուցիչները։

Ակցիայի մասնակիցները պարզել են Թուրքիայի ու Ադրբեջանի դրոշները, ինչպես նաև Ռեջեփ Թայիփ Էրդողանին պատկերող պաստառներ և բացականչել ԱՄՆ վարած քաղաքականությունը քննադատող և թուրքական տնտեսությանն աջակցող կարգախոսներ։

Նրանք նաև կոչ են արել Թուրքիայի հետ բարեկամական հարաբերություններ ունեցող երկրներին հրաժարվել ամերիկյան դոլարից, գնել թուրքական արտադրության ապրանքներ։ Ի նշան թուրքական տնտեսությանն աջակցության՝ ակցիայի մասնակիցներն ամերիկյան դոլարներ են այրել։

Հիշեցնենք, որ Թուրքիայի նախագահ Ռեջեփ Թայիփ Էրդողանի կարգադրությամբ չորեքշաբթի, ի պատասխան ԱՄՆ-ի սահմանած պատժամիջոցների, կտրուկ բարձրացվել են մի շարք ամերիկյան ապրանքների ներկրման համար մաքսատուրքերը։ ԱՄՆ-ից ծխախոտի ներկրման մաքսատուրքն ավելացել է 60%-ով, ալկոհոլինը՝ 140%-ով, մեքենաներինը՝ 120%-ով:

Բացի այդ, ավելացել են բրնձի, մրգերի, կոսմետիկ պարագաների և մի շարք այլ ապրանքների ներկրման համար մաքսատուրքերը: Նախօրեին Էրդողանը հայտարարել էր, որ երկիրը կբոյկոտի Միացյալ Նահանգներում արտադրվող էլեկտրատեխնիկան:

Ավելի վաղ հաղորդվել էր, որ ԱՄՆ-ն կրկնապատկել է Թուրքիայից ալյումինի ու պողպատի ներկրման համար մաքսատուրքերը, ինչպես նաև Թուրքիայում ամերիկացի հոգևորականի կալանավորման շուրջ տարաձայնությունների ֆոնին նոր պատժամիջոցներ է սահմանել Անկարայի նկատմամբ: