Նախկին և ներկա պաշտոնյաների, օլիգարխների կանանց կոչ եմ անում ձեր զարդերը նվիրաբերել «Արմենակ Ուրֆանյան» հիմնադրամին. Ա. Հակոբյան
Հասարակություն
Վարչապետի տիկին Աննա Հակոբյանը նախկին և ներկա պաշտոնյաների, օլիգարխների կանանց կոչ է անում իրենց զարդերը նվիրաբերել «Արմենակ Ուրֆանյան» հիմնադրամին: Այս մասին վարչապետի տիկինը հայտարարեց այսօր վարչապետի նստավայրում Ապրիլյան պատերազմում զոհված զինծառայողների ծնողների հետ հանդիպմանը:
«Կարծում եմ՝ կան այդպիսի կանայք, ովքեր կմտածեն և կհանգեն այն եզրակացության, որ այն ունեցվածքը, որն իրենք ձեռք են բերել իրենց ամուսինների պաշտոնավարման տարիներին, այնքան էլ արդար քրտինքով վաստակած ունեցվածք չէ, և դրա մի մասը նվիրաբերելով հիմնադրամին, դրանից հետո կարող են ավելի հանգիստ գլուխը դնել բարձին»,- նշեց Աննա Հակոբյանը:
Վարչապետի տիկնոջ հետ հանդիպման ժամանակ ապրիլյան պատերազմին զոհված զինծառայողների մայրերը հայտարարել էին «Կանայք հանուն խաղաղության» արշավին միանալու մասին: Իսկ կապիտան Արմենակ Ուրֆանյանի մայրը՝ տիկին Համեստը տեղեկացրել էր, որ որդու անվամբ բարեգործական հիմնադրամ է ստեղծում:
Աննա Հակոբյանը շնորհակալություն հայտնեց «Կանայք հանուն խաղաղության» արշավին միանալու համար:
«Երբ ես առաջին անգամ խոսեցի այս արշավի մասին, ինձ մեղադրական հարցեր ուղղվեցին, թե ինչպես իմ նախաձեռնությանը կվերաբերվեն Ապրիլյան պատերազմի ժամանակ իրենց որդիներին կորցրած մայրերը: Ես այս հարցի պատասխանն իմ հոգու խորքում իհարկե ունեի, բայց շատ կարևոր էր, որ այդ հարցի պատասխանն այսօր հնչեց ձեր կողմից»,- ասաց նա:
Վարչապետի տիկինը նշեց, որ ապրիլյան պատերազմի հանգուցալուծումը եղել է մեր 18-20 տարեկան տղաների, զոհված զինծառայողների հերոսության շնորհիվ:
«Մենք Հայաստանի և Արցախի քաղաքացիներս, ամբողջ աշխարհում ապրող մեր հայրենակիցների հետ միասին մինչև մեր կյանքի վերջ պարտք ենք ձեզ։ Աշխարհում չկա մի բան, որով մենք կարող ենք ձեզ վարձահատույց լինել, դուք հայրենիքին տվել եք անգինը, անփոխարինելին:
Հիմա ձեր այս քայլով դուք շարունակում եք ծառայել հայրենիքին, դուք մեծ ծառայություն եք մատուցում բոլոր այն մայրերին, ում որդիների կյանքը դեռ հնարավոր է խնայել: Պատահական չէ, որ ձեր որդիներն են հերոսացել Ապրիլյան քառօրյայում: Նրանց հերոսությունը, սխրագործությունը վստահաբար գիտակցաբար է տեղի ունեցել, որովհետև այսպիսի մայրերից կծնվեին միմիայն հերոս և քաջ որդիներ»,- ասաց Աննա Հակոբյանը:
Նա նաև շատ կարևորեց ադրբեջանցի մայրերին ուղղված ուղերձը։ Ա. Հակոբյանը հույս հայտնեց, որ հայ որդեկորույս մայրերի ձայնը կհասնի նաև ադրբեջանցի մայրերին և նրանք նույնպես կխոսեն ընդդեմ պատերազմի և հանուն խաղաղության:
«Դա միանշանակ չի ընդունվում մեր հասարակության կողմից, այդ ուղերձն անելու համար նույնպես քաջություն է պետք: Ինչո՞ւ միանշանակ չի ընդունվու, որովհետև ինձ այդ ելույթից հետո ասում էին, որ չի կարելի նույնացնել և այլն: Բայց արդյոք մայրությունը ճանաչո՞ւմ է ազգություն, կրոն, մաշկի գույն, իհարկե, ոչ։ Մայրությունը միայն ճանաչում է անսահման սեր և գուրգուրանք: Սեփական երեխայի կորուստը նույնն է բոլոր մայրերի մոտ»,- ասաց Աննա Հակոբյանը:
1
2
3
4
5
1
2
3
4
5
1
2
3
5
