ԱՄՆ-ն չի կարող եվրոպացիների փոխարեն որոշել՝ ում հետ առևտուր անել. Բելգիայի վարչապետ

ԱՄՆ-ն չի կարող եվրոպական ընկերությունների փոխարեն որոշել՝ ում հետ և որտեղ առևտուր անել և զարգացնել տնտեսական գործունեությունը: Այդ մասին չորեքշաբթի հայտարարել է Բելգիայի վարչապետ Շառլ Միշելը, գրում է «ՌԻԱ Նովոստի»-ն:

«Մենք չենք կարող համաձայնել նրա հետ, որ ԱՄՆ-ն է որոշում, թե որ տարածաշրջանների հետ եվրոպական ընկերությունները կարող են առևտուր իրականացնել»,- ասել է վարչապետը:

Միշելն արևմտյան առաջնորդներից առաջինն է Նյու Յորքում ՄԱԿ-ի Գլխավոր վեհաժողովի շրջանակում երկկողմ հանդիպում անցկացրել Իրանի նախագահ Հասան Ռոհանիի հետ: 2019 թվականի հունվարից Բելգիան երկու տարով զբաղեցնելու է ՄԱԿ-ի Անվտանգության խորհրդի ոչ մշտական անդամի աթոռը:

Բելգիայի վարչապետը նշել է, որ իրենք «միամիտ չեն Իրանի և նրա տարածաշրջանային դերի կարևորության հարցում»:

«Միևնույն ժամանակ, իրանական միջուկային էներգետիկան ապամոնտաժելու մասին համաձայնագիրը քաղաքական երկխոսության ճանապարհ է բացում՝ Իրանում աջակցելու համար ուժերին, որոնք ցանկանում են արդիականացնել երկիրը, ամրապնդել տնտեսությունը և որոնք պատրատ են ստանձնել միջուկային դեէսկալացիայի վերաբերյալ պարտավորություններ»,- նշել է Միշելը:

Հիշեցնենք, որ Իրանն ու «միջնորդ վեցյակը» 2015թ. հուլիսի 14-ին պատմական համաձայնության են եկել իրանական ատոմային երկարամյա խնդրի կարգավորման հարցում. Գործողությունների համատեղ համապարփակ ծրագիր է ընդունվել, որի իրագործմամբ վերացվում են Իրանի դեմ ՄԱԿ-ի ԱԽ-ի, ԱՄՆ-ի և Եվրամիության սահմանած տնտեսական և ֆինանսական պատժամիջոցները: Ամիսներ առաջ, սակայն, ԱՄՆ նախագահ Դոնալդ Թրամփը հայտարարել է, որ երկիրը դուրս է գալիս Իրանի միջուկային համաձայնագրից և կրկին պատժամիջոցներ կսահմանի Իրանի դեմ:

Դոնալդ Թրամփի վարչակազմը հայտարարել է, որ պատժամիջոցների թիրախում կհայտնվեն նաև երրորդ երկրների այն ընկերությունները, որոնք կշարունակեն համագործակցել Իրանի հետ: Պատժամիջոցների տակ հայտնվելու սպառնալիքի պատճառով մի շարք եվրոպական խոշոր ընկերություններ արդեն հայտարարել են Իրանում իրենց գործունեությունը դադարեցնելու մասին: