Ռուսաստանի հավաքականի դարպասապահ Իգոր Ակինֆեևն ավարտեց միջազգային կարիերան

ԲԿՄԱ-ի դարպասապահ Իգոր Ակինֆեևն այլևս հանդես չի գա Ռուսաստանի հավաքականի կազմում:

32-ամյա ֆուտբոլիստը հայտարարել է միջազգային կարիերան ավարտելու մասին, հայտնում է ԲԿՄԱ-ի պաշտոնական կայքը:

«Ցանկացած պատմություն ունի իր սկիզբն ու ավարտը: Ահա և իմ պատմությունը հավաքականում մոտեցավ իր տրամաբանական ավարտին:

Ինձ համար մեծ պատիվ էր Ռուսաստանի հավաքականին որպես ավագ դուրս բերել տնային աշխարհի առաջնությունում: Անկեղծ ասած, ես դրա մասին անգամ երազել չէի կարող:

Բայց դա տեղի ունեցավ և դարձավ, հավանաբար, հավաքականում իմ կարիերայի գագաթնակետը: Այո, մենք մեդալներ չնվաճեցինք աշխարհի առաջնությունում, բայց բոլոր տղաներն արեցին այն, ինչ կարող էին:

Հավաքականում 15 տարին ահռելի ժամանակ է: Յուրաքանչյուր տարի ավելի բարդ էր դառնում խաղալ երկու ճակատով ու կրել առավելագույն ծանրաբեռնվածությունը:

Հաշվի առնելով եղած վնասվածքները` ավելի շատ ժամանակ էր անհրաժեշտ լինում վերականգման համար: Եվ հիմա ես շատ հստակ գիտակցեցի, որ ժամանակն է զիջել ճանապարհն ավելի երիտասարդ դարպասապհներին և կենտրոնանալ իմ ակումբի` ԲԿՄԱ-ի ելույթների վրա»,- ասել է Ակինֆեևը:

Նշենք` Ակինֆեևը 2004 թվականից է հանդես եկել Ռուսաստանի հավաքականի կազմում: Նա 110 հանդիպման է մասնակցել, որոնցում բաց է թողել 95 գնդակ: 

2017 թվականից ի վեր Իգոր Ակինֆեևը եղել է հավաքականի ավագը, ինչպես և Ռուսաստանի համար հաջող դասավորված աշխարհի առաջնությունում: