Վարչապետի թեկնածու առաջադրելը Կառավարության ու քաղաքացիների համար մեծ խնդիր չի դառնա. խնդիրներ կլինեն նման հայտարարություն անողների համար. վարչապետ

ԱԺ-Կառավարություն հարցուպատասխանի ժամին «Ելք» խմբակցության պատգամավոր Ալեն Սիմոնյանը ՀՀ վարչապետից հետաքրքրվեց, թե երեկ ԱԺ խմբակցությունների հետ ի վերջո ինչ խոսակցություն է եղել՝ հաշվի առնելով, որ այսօր «Ծառուկյան դաշինք» խմբակցության և «ՀՀԿ» խմբակցության ներկայացուցիչները չեն հերքել իրենց կողմից հնարավոր վարչապետի թեկնածու առաջադրելու հարցը:

Նիկոլ Փաշինյանը կրկնեց այն, ինչ երեկ հայտարարել էր, որ տրամաբանությունն է ասել, որ դեկտեմբերին ՀՀ-ում պետք է տեղի ունենան արտահերթ խորհրդարանական ընտրություններ։ «ՀՀԿ» և «Ծառուկյան դաշինք» խմբակցությունների ներկայացուցիչներն ասել են, որ վարչապետի պաշտոնը թափուր մնալու դեպքում չեն պատրաստվում թեկնածու առաջադրել: Սա եղել է այն համատեքստում, որ մեր գործընկերները հստակ արձանագրել են քաղաքական վիճակը, որ առկա է երկրում, և խելամտությունը ստիպում է, որ «երկրորդ մայիսի մեկ» անելու գայթակղությանը տրվելը անտեղի ու ավելորդ կլինի»,- ասաց նա:

Ալեն Սիմոնյանը հետաքրքրվեց, թե բացի «ՀՀԿ» և «Ծառուկյան դաշինք» խմբակցություններից, ՀՅԴ-ն ի՞նչ է ասել, Նիկոլ Փաշինյանը նշեց, որ ՀՅԴ-ն էլ ասվածի հետ համաձայնվել է: