ՄԱԿ-ը կոչ է արել Թուրքիային և Սաուդյան Արաբիային անհապաղ քայլեր ձեռնարկել Ստամբուլում սաուդացի լրագրողի անհետացման գործով
Միջազգային
ՄԱԿ-ը կոչ է արել Թուրքիային և Սաուդյան Արաբիային անհապաղ քայլեր ձեռնարկել սաուդացի հայտնի ընդդիմադիր լրագրող, The Washington Post-ի թղթակից Ջամալ Խաաշկղիջիի անհետացման հանգամանքները պարզելու և լրագրողին գտնելու համար, գրում է Sputnik-ի թուրքական ծառայությունը:
Oրեր առաջ Ստամբուլում Սաուդյան Արաբիայի գլխավոր հյուպատոսարան մուտք գործած ու այնտեղից այդպես էլ դուրս չեկած սաուդացի հայտնի ընդդիմադիր լրագրող Խաաշկղիջին, ըստ թուրքական ոստիկանության վարկածի, սպանվել է շենքի ներսում: Սաուդյան Արաբիայի հյուպատոսությունը հերքել է այդ վարկածն ու շարունակել պնդել, որ լրագրողը դուրս է եկել շենքից ու կորել դրանից հետո միայն:
ՄԱԿ-ի Մարդու իրավունքների գրասենյակի խոսնակ Ռավինա Շամդասանին, անդրադառնալով խնդրին, նշել է, որ եթե լրագրողի՝ հյուպատոսության շենքում սպանվելու մասին կասկածներն իսկապես ճիշտ են, ապա դա իսկապես «շոկային է»:
Ավելի վաղ ՄԱԿ-ի գլխավոր քարտուղար Անտոնիո Գուտերեշը հայտնել էր, որ շատ անհանգստացած է Խաաշկղիջիի անհետացման փաստով ու աշխարհում լրագրողների դեմ բռնության դեպքերի ավելացմամբ:
Հիշեցնենք, որ ավելի վաղ հաղորդվել էր, որ Թուրքիայում Սաուդյան Արաբիայի դեսպանը կանչվել է ԱԳՆ՝ կորած լրագրողի մասին պարզաբանումներ տալու:
Նախօրեին Թուրքիայի նախագահ Ռեջեփ Թայիփ Էրդողանը Սաուդյան Արաբիայի ստամբուլյան հյուպատոսությունից պահանջել է վերծանել անվտանգության տեսախցիկների տեսաձայնագրությունները, որոնց միջոցով պարզ կդառնա՝ արդյոք լրագրողն իսկապես շենքից դուրս եկել է, թե ոչ:
1
2
3
4
5
3
4
5
1
2
3
4
5
