Բալասանյանի մեսսիջ-բացահայտումները

Արման Գրիգորյանը ֆեյսբուքյան իր էջում գրում է.

Երեկ Գյումրու քաղաքապետ Ս. Բալասանյանի համար հիրավի կարելի է համարել անկեղծ խոստովանությունների ու բացահայտումների օր` չնայած նույնիսկ այն հանգամանքին, որ այն միջոցառումը, որի ընթացքում կատարվեցին այդ բացահայտումները, ներկա էին նաև լրագրողներ` ինչպես տեղում գործող, այնպես էլ հանրապետական ԶԼՄ-ների մարզային թղթակիցներ:

Բանն այն է, որ այսօր Գյումրու քաղաքապետը հրավիրել էր խորհրդակցություն քաղաքապետարանի ենթակայության տակ գործող մանկապարտեզների տնօրենների ու վերջիններիս սնունդ մատակարարող ընկերությունների ներկայացուցիչների մասնակցությամբ , որի ընթացքում սակայն քննարկվեցին նաև այլ հարցեր` սկսած տնօրենների աշխատանքի որակից ու պրոֆեսիոնալիզմից մինչև ընթացիկ գործավարական:

Ու այս ամենի մեջ ուշագրավն այն էր, որ Ս. Բալասանյանը, չկաշկանդվելով լրագրողների ներկայությունից, իսկ գուցե և հենց նրանց համար էլ, հայտարարեց ընդամենը ամիսներ առաջ իր գործություներությունը քաղաքապետի գրությամբ և մարզպետի առաջարկությամբ դադարեցրած "Արևիկ" մանկապարտեզի տնօրենին բառացիորեն հետևյալը. "Խնդրում եմ չքաղաքականացնել ձեր պաշտոնն ու աշխատանքը: Գնացեք ում ուզում եք պաշտպանեք, այ մարդ ես շնորհակալ եմ ձեզանից էլ, ինձ տված ձեր ձայներից էլ, նստեք նորմալ աշխատեք, ձեր քաղաքական գործերը էս գործի հետ մի խառնեք, մեջտեղում մեր երեխաներն են: Ես էլի ձեր կողքին կանգնած եմ, իսկ ուր են նրանք, որոնք ասում էին, թե ձեր կողքին կանգնած են: Գնացեք պայքարեցեք ու հասեք այն բանին, որ մանկապարտեզը վերաբացվի":

Նման հայտարարությունն իրոք զարմանալի է ու ինտրիգային: Ում նկատի ուներ քաղաքապետն ու ինչու դժվար չէ հասկանալ, քանի որ, ըստ շրջանառվող լուրերի, դեռևս կան կադրեր` քաղաքապետարանի ենթակայության ներքո գործող կառույցներում, ովքեր համարվում են չափազանց հնաբնակ: Վերջիններս մինչ վերջին տարիներն ունեցել են բավական անկախություն` հուսկ ասենք մանկապարտեզների պարագայում սեփական հայեցողությամբ մատակարար ընտրելու ու պայմանագրեր կնքելու առումով: Ներկայումս, երբ արդեն գործում է կենտրոնացված համակարգը և ասենք մանկապարտեզների տնօրեններից այդ մասամբ օրինական մասամբ ինքնիրավչական գործառույթը վերցվել է, վերջիններս երբեմն դիմում են այսպես ասած "դիպլոմատիկ բոյկոտի" մեթոդին ցույց տալու համար որ վիճակը շատ վատ է ու պետք է իրենց հասնել փրկել:

Թերևս այս համատեքստում էր, որ Բալասանյանն որ այնքան կոնկրետ դեպքում մանկապարտեզների տնօրեններին, որքան վերջիններիս թիկունքին գտնվողներին մեսսիջ ուղարկեց: Պակաս հետաքրքրական ու ինտրիգային չէր նաև երկրորդ մեսսիջը: Խոսելով մանկապարտեզների առաջ ծառացած խնդիրների մասին` Բալասանյանն հորդորեց բառացիորեն հետևյալը. "Մեկ մեկ էլ ձեր ամուսիններին ասեք էլի, որ որոշ հարցերում օգտակար լինեն մանկապարտեզին, օգնեն:

Վերջին հաշվով քաղաքի համար է, մեր երեխաների համար է: Ինչ անեմ, մի անգամ էլ էս կարգի խորհրդակցություն ձեր ամուսինների համար կազմակերպեմ": Գյումրեցիները լավ գիտեն, որ Գյումրիում տնօրեն, նույնիսկ նախակրթարանի, պատահական մարդիկ չեն դառնում ու յուրաքանչյուր մանկապարտեզի տնօրենի /որոնք առանց բացառության կանայք են/ ամուսինները կամ ներկայացնում են տեղի գործարարներին ու ունևոր խավը առհասարակ` ընդհուպ մինչև պատգամավորներ:

Ստացվում է, որ Գյումրու քաղաքապետը այս հորդորով իրոք ակնկալում է ունևոր ամուսինների աջակցությունը, կամ պարզապես հասկացնում, որ ասենք որևէ գյումրեցի զորօրինակ հարուստ մարդու կինը մանկապարտեզի տնօրեն է, նա այդ պաշտոնին է ոչ հենց այնպես, այլ որպեսզի որոշ դեպքերում էլ տվյալ նախակրթարանի խնդիրներով զբաղվի ունևոր ամուսինը:

Իսկ այն, որ իրոք քաղաքի բյուջեն խիստ սահմանափակ է ու սուղ և իրոք կարիք կա, որ բարի կամքի տեր մարդիկ ինչպես քաղաքից այնպես էլ դրսից կանգնեն գոնե նախակրթարանների կողքին, գիտենք բոլորս:

Միայն այն, որ այս տարի քաղաքին հատկացված դոտացիան նվազեց, որովհետև քաղաքի մշտական բնակչության թիվը նվազել է, արդեն խոսում է բյուջեի լղարիկության մասին /այստեղ պետք է հաշվի առնել, որ հետագա ավելացումը ոչ թե բուն դոտացիային է վերաբերվում, այլ կապված աշխատավարձերի ավելացման հետ` հավելմանը` աշխատակիցների աշխատավարձերը հստակ պաշտպանելու համար/: