ԿԲ-ն կանխատեսում է 3.6% տնտեսական աճ

Նարեկ Սարգսյանը ֆեյսբուքյան իր էջում գրում է .

Տարեսկզբին թե միջազգային ֆինանսական կազմակերպությունների, և թե Կենտրոնական բանկի սպասումները Հայաստանի տնտեսական աճի վերաբերյալ վատատեսական էին: Պատահական չէր, որ առաջին եռամսյակի դրամավարկային քաղաքականության ծրագրի հաշվետվությունում ԿԲ-ն կանխատեսում էր հազիվ 0,4-2 տոկոս աճ։ Այժմ արդեն ԿԲ-ն Հայաստանի տնտեսական աճի հավանականությունը հասցրել է ընդհուպ մինչև 3,6 տոկոսի։

Այսպիսի գնահատականի համար հիմք են հանդիսացել տնտեսության մեջ արձանագրված փաստացի ցուցանիշները։

Երկրորդ եռամսյակի ծրագրում ԿԲ-ի ակնկալիքներն ավելացան՝ հասնելով 1,6-2,6 տոկոսի։ Արձանագրված ցուցանիշները հիմք տվեցին Կենտրոնական դրամատանը արդեն երրորդ եռամսյակի դրամավարկային քաղաքականության ծրագրում ընթացիկ տարվա համար կանխատեսել 2,8-3,6 տոկոս տնտեսական աճ։ Այլ կերպ ասած, ԿԲ-ն աճի պոտենցյալն ավելացել է 1 տոկոսով։ 
Սպասումների փոփոխությունը ԿԲ-ն պայմանավորել է մի շարք գործոններով:

Մասնավորապես փոփոխության վրա ազդեցություն է ունեցել դրամավարկային պայմանների թուլացումը, կառավարության կողմից իրականացվող խթանող հարկաբյուջետային քաղաքականությունը, ինչպես նաև գյուղատնտեսության ոլորտում արձանագրված դրական զարգացումները։ 
Կտրուկ վերանայվել են սպասումները հատկապես գյուղոլորտում։ Եթե նախորդ կանխատեսման մեջ տնտեսության այս ճյուղի աճի հավանականությունը գնահատվում էր 6,5-6,7 տոկոս, ապա այժմ ԿԲ-ն հավատում է, որ այն կլինի 10,5-11,5 տոկոս։