Խնդրում եմ, չավելացնել մեր ընտանիքի ցավը. Կարեն Ավագյանը՝ եղբոր մասնակցությամբ վթարի մասին

NEWS.am-ը գրում է.

Դժբախտ դեպքերից ոչ ոք ապահովագրված չէ։ Ցավոք, մեր ընտանիքն էլ չի խուսափել նման պատահարից։ Ցավում եմ կատարվածի հետ կապված։ Հիվանդին շուտափույթ ապաքինում եմ մաղթում։ Այս մասին հայտարարություն է տարածել ՀՀԿ խմբակցության պատգամավոր, ՀՀԿ երիտթեւի ղեկավար Կարեն Ավագյանը:

Նա նաեւ նշել է. «Եղբայրս դեպքի պահից վթարի ենթարկվածի կողքին է մինչ այժմ։ Քննչական գործողություններն ընթանում են, ընթանում են խստորեն օրենքի սահմաններում։ Ինքս եմ անձամբ հետեւում ընթացքին ու անաչառությանը:

Մենք մեծ դժբախտություն ենք ունեցել այս գիշեր:

Խնդրում եմ՝ անհարկի շահարկումներով, իրականության հետ կապ չունեցող գունավորումներով չավելացնել մեր ընտանիքի ցավը: Առաջին հերթին տուժողի ընտանիքի:

Փառք ենք տալիս Աստծոն, որ հնարավոր եղավ խուսափել վատագույն սցենարից»:

Ավելի վաղ NEWS.am-ը հայտնել էր, որ օգոստոսի 23-ին, ժամը 23:35-ին ՏԿԱԻՆ-ում ահազանգ է ստացվել, որ Երեւան-Սեւան ավտոճանապարհին` Առինջ գյուղի մոտակայքում, տեղի է ունեցել ավտովթար, կան տուժածներ:

Պարզվել է, որ «Տոյոտա Կորոլա» մանիշի 058 ՕՕ 11 պ/հ ավտոմեքենայի վարորդը, վրաերթի է ենթարկել ճամփեզրին կայանված «Օպել Զաֆիրա» մանիշի 76 SS 076 պ/հ ավտոմեքենայի վարորդ` 28-ամյա Է. Ս.-ին, ով, մինչ հրշեջ-փրկարարների դեպքի վայր հասնելը, տեղափոխվել է «Սբ. Գրիգոր Լուսավորիչ» ԲԿ:

Ըստ Shamshyan.com-ի՝ 28-ամյա երիտասարդին վթարի ենթարկած Toyota-ի համարանիշները հաշվառված են ԱԺ հաշվեկշռում եւ սպասարկում է ԱԺ պատգամավոր, ՀՀԿ երիտթեւի ղեկավար Կարեն Ավագյանին, իսկ վրաերթի հեղինակ Արթուր Ավագյանը Կարեն Ավագյանի եղբայրն է, որն աշխատում է Երեւանի Վ. Բրյուսովի անվան լեզվաբանական համալսարանում՝ որպես ֆինանսատնտեսական գծով պրոռեկտոր:

Ըստ կայքի տեղեկությունների վրաերթի ենթարկվածը իրեն պատկանող «Օպել Զեֆիրա» ավտոմեքենայի ծակված անվադողը փոխելիս է եղել, երբ «Տոյոտա»-ն հարվածել է նրան:

Ըստ այդմ, «Տոյոտան» շատ արագ է ընթանալիս եղել: Տեղում հավաքված մարդիկ արագ տուժածին հասցրել են հիվանդանոց եւ հնարավոր է եղել փրկել նրա կյանքը: «Տոյոտա»-ի վարորդն այնքան ուժեղ էր խփել, որ անգամ «Օպել»-ի անիվն էր հետը մոտ մի 40 մետր տարել: Դրանից հետո ավտոն թողել էր ու ինքը անհետացել էր»,-ասել էին ականատեսները: