Կոռուպցիայի հեռու մնալու պատվիրանն այսօր էլ անփոփոխ է. Արա Զոհրաբյանի խորհուրդը փաստաբանական դպրոցի շրջանավարտներին

ՀՀ փաստաբանների պալատի խորհրդի այսօրվա՝ 2018թ. դեկտեմբերի 8-ի նիստի օրակարգում ՀՀ փաստաբանական դպրոցի 51 շրջանավարտներին արտոնագրեր տալու հարցն էր:

ՀՀ փաստաբանների պալատից, փաստաբանների պալատի նախագահ Արա Զոհրաբյանը ողջույնի խոսքում շնորհավորել է շրջանավարտներին փաստաբան դառնալու կապակցությամբ: Նա նշել է, որ Փաստաբանների պալատը յուրաքանչյուր նոր հոսքի հետ նոր հույսեր է կապում:  «Ձեր համարձակությամբ, համառությամբ և ազատամտությամբ պետք է պաշտպանեք ձեր վստահորդի իրավունքներն ու օրինական շահերը, դրանով լուծեք նաև Սահմանադրությամբ երաշխավորված յուրաքանչյուրի իրավաբանական օգնություն ստանալու իրավունքի իրականացումը»,-նշել է Արա Զոհրաբյանը:

Խոսելով փաստաբանական դպրոցի կարևորության մասին՝ Արա Զոհրաբյանը հայտնել է, որ սա կարևոր հաստատություն է, քանի որ սովորելու ընթացքում, բացի գիտելիքներից և հմտություններին, ունկնդիրները մեծ շրջապատ են ձեռք բերում:

Պալատի նախագահը խոսել է փաստաբանական համայնք ընդունվելիս կոռուպցիայի մեջ թաթախվելու անընդունելիությունից: Նա մասնավորապես ասել է․ «Կոռուպցիայից հեռու մնալու պատվիրանն անփոփոխ է, ինչպես այսօր, այնպես էլ ձեր ողջ մասնագիտական կարիերայի ընթացքում: Կոռուպցիան մեծ վտանգ է ներկայացնում մեր մասնագիտության նկատմամբ»:

Փաստաբանական դպրոցի տնօրեն Սիմոն Բաբայանը նույնպես շնորհավորել է շրջանավարտներին և ասել․ «Դուք մուտք եք գործում փաստաբանական համայնք մեծ ակնկալիքով: Շնորհավորում եմ ձեզ բավականին բարդ ուսումնական գործընթացով անցնելու և այն հաղթահարելու կապակցությամբ: Պետք է նշեմ, որ ուսումնական գործընթացը մենք տարեցտարի կատարելագործում ենք: Դրա արդյունքում ստեղծվում են ուսումնական արգելքներ, սրանով ապահովում ենք ակադեմիական արդարությունը»:

Փաստաբանների պալատի նախագահի տեղակալ, Խորհրդի անդամ Կարեն Մեժլումյանն էլ իր շնորհավորական խոսքում առանցնացրել է մի փաստ, որ դատարաններում արդեն հանդիպում են փաստաբաններ, որոնք նոր սերնդից են, գրագետ են, խոհեմ ու վստահելի: Նրա խոսքով փաստաբանն իր վստահորդի հետ պետք է առավելագույնս անկեղծ լինի: «Ես կարծում եմ, որ դա փաստաբանի հաջողության ու հեղինակության գրավականն է»,-ընդգծել է նա:

Խորհրդի անդամ Սեդրակ Ասատրյանն էլ օրը պատմական է համարել, քանի որ նրա խոսքով 10 տարի առաջ չէինք կարող երազել, որ այս որակի փաստաբաններ կարող ենք ունենալ: «Այսօր որպես դասախոս լսարան մտնելիս անհրաժեշտ է զգույշ լինել քանի որ ունկնդիրները բավականին լուրջ ճանապարհ անցած անհատականություններ են: Մեր վրացի գործընկերները ակնածանքով են խոսում մեր փաստաբանական դպրոցի մասին»,-նշել է նա:

Ողջույնի ու երախտիքի խոսքերից հետո շրջանավարտները երդվել են ազնիվ և բարեխիղճ կատարել փաստաբանի պարտականությունները, պահպանել փաստաբանական գաղտնիքը, պաշտպանել վստահորդների իրավունքները, ազատությունները և շահերը՝ ղեկավարվելով Հայաստանի Հանրապետության Սահմանադրությամբ, օրենքներով և փաստաբանի վարքագծի կանոնագրքով: