«Այժմ էլ նոր իշխանություններից ենք պահանջելու»

Պարզվում է՝ Երևանի նոր իշխանությունների կարծիքով, տրանսպորտային ցանցի խնդիրները դեռ երկար ժամանակ չեն լուծվելու: Եվ ամենահետաքրքիրն այն է, որ այդպես էլ չեն մեկնաբանում, թե ինչու է այդ աստիճան անհնարին դարձել Երևանի ներքաղաքային տրանսպորտային ցանցի հարցը լուծելը: «Իրազեկ և պաշտպանված սպառող» հասարակական կազմակերպության նախագահ Բաբկեն Պիպոյանը, ով նաև տրանսպորտի հարցերն ուսումնասիրող հանձնաժողովի անդամ է, ինքն էլ չգիտի, թե առաջարկվող տարբերակում քաղաքային նոր իշխանություններն ինչ խնդիր են տեսել, որի պատճառով որոշել են հարցը 2–ից 4 տարով հետաձգել:

«Սա խայտառակություն է, քանի որ արդեն իսկ իրականացվել է մեծածավալ աշխատանք, որի արդյունքում տրվել են համակարգային լուծումների 90 տոկոսից ավելիի պատասխանները: Եվ եթե անգամ այստեղ կան թերություններ, ապա հարկավոր է դրանք վերացնել, ոչ թե ընդամենը մեկ թերություն նկատել ու նոր հեծանիվ հորինելու մասին մտածել: Այստեղ ամեևին էլ էական չէ, թե այդ աշխատանքը կարելի էր, թե չէր կարելի ավելի մատչելի գնով իրականացնել, բայց փաստացի այդ ծրագիրը կազմվել է, որի վրա մոտ 850 հազար դոլար գումար է ծախսվել: Այս պարագայում ինձ հետաքրքրում է, թե ո՞ր փորձագետն է իրեն ավելի լավ մասնագետ համարում, որ կարող է ավելի լավ կատարել այն հսկայածավալ աշխատանքը, որն արդեն իսկ իրականացված է»,– ասաց Բաբկեն Պիպոյանը:

Ի դեպ, նշենք, նաև, որ մոտ 1 միլոն դոլարանոց այս ծրագրում ներգրավված են եղել Երևանի քաղաքապետարանի, այլ պետական հաստատությունների և քաղհասարակության ներկայացուցիչներ, որոնք ծրագրի վրա աշխատել են առանց որևէ ֆինանսավորում ստանալու: Այսինքն, նշված գումարից բացի այդ փաթեթի աշխատանքներն իրականացնելու համար ծախսվել են նաև հանրային ռեսուրսի ջանքերն ու հնարավորությունները, որոնք առանց ֆինանսական աջակցության են ներգրավվել այդ աշխատանքային խմբում: Եվ այս պարագայում ջուրը նետել ամեն ինչ և հայտարարել, որ այն պիտանի չէ, քանի որ թերություններ ունի, համաձայնեք, որ լուրջ մոտեցում չէ:

«Ինձ համար հասկանալի չէ, թե ինչ թերություններ են հայտնաբերվել, որ դրանք չեն կարող շտկվել: Իսկ եթե իսկապես փաթեթը լավը չէ, ապա հարկավոր է հետ կանչել այն գումարը, որը ծախսվել է այդ ծրագրի մշակման վրա: Քննարկումների ժամանակ ես դեմ էի աշխատանքի տեմպերին, ես կողմ էի ավելի լավ մոդելի մշակմանը, բայց իմ խնդիրը ոչ թե հետ, այլ առաջ նայելն է: Եթե համակարգը տարեսկզբից ներդրվեր, այսօրվա դրությամբ մենք արդեն իսկ ավելի լավ տրանսպորտային համակարգ կունենայինք: Բայց ներկայիս իշխանությունները նման մոտեցում ցուցաբերելով՝ խնդիրն ավելի հետ են տանում, որի իմաստը ինձ համար, անկեղծ ասած, հասկանալի չէ»,– ասաց Բ. Պիպոյանը:

Նախագծով առաջարկվում է նոր երթուղային ցանց ներդնել, որը պետք է նոր միասնական օպերատորով գործեր, իսկ բիզնեսը պարտավոր էր հաշվի նստել այդ իրողության հետ: Բայց, եթե այսօրվա դրությամբ բիզնեսը կարողացել է ներկա իշխանություններին «համոզել», որ իրենք ավելի ուժեղ են, ապա հարկավոր է պարզաբանել, որ սպառողների համար էլ պարզ լինի, թե ինչու քայքայված տրանսպորտային ցանցը չի փոխարինվում նորով և ինչո՞ւ տրանսպորտի արդիականացման ծրագիրը չի ներդրվում:

«Քաղաքապետարանը պետք է հնչեցնի իր տեսակետը, թե ինչու չի ցանկանում իրականացնել այդ ծրագիրը, քանի որ 2 կամ 4 տարի հարցը հետաձգելը խայտառակություն է: Նման բան ասողն անուղղակի ընդունում է, որ ինքը չի հասկանում և չի պատկերացնում խնդրի կարևորությունը, քանի որ 2–4 տարում էլ ավելի բարդ վիճակի մեջ կհայտնվի տրանսպորտային ցանցը: Դա նշանակում է նաև, որ առնվազն այդքան տարի գործող տրանսպորտային ցանցով պետք է կարողանան սպասարկում իրականացնել: Այսինքն, ստացվում է, որ գործող բիզնեսը պետք է նորից ներդրում անի, իսկ այդ պարագայում արդեն բիզնեսը իշխանություններին կստիպի ոչինչ չանել, մինչև կատարված ներդրումները հետ գան: Մեր այսօրվա քաղաքային իշխանությունները պետք է նվազագույնը կա՛մ այսքանը հասկանան և նման հայտարարություններ չանեն, կա՛մ հիմնավորեն, թե ինչո՞ւ են այդպես կարծում»,– ասաց Բ. Պիպոյանը: