ԱՄՆ-ում հրաձգության հետ կապված միջադեպերը ահաբեկչությունից վտանգավոր են դառնում․Օբամա

Հրազենային զենքի կիրառումով Միացյալ նահանգներում կատարվող միջադեպերը ահաբեկչությունից ավելի վտանգավոր են դառնում։ Նման տեսակետ է հայտնել ԱՄՆ նախագահ Բարաք Օբաման ՝ ABC հեռուստաընկերությանը տված հարցազրույցում մեկնաբանելով Վիրջինիա նահանգում երկու լրագրողների սպանությունը։

«Ամեն անգամ, երբ լսում եմ նման ողբերգությունների մասին, սիրտս կտոր- կտոր է լինում։ Մենք գիտենք, որ հրաձգության հետ կապված միջադեպերի հետեւանքով մեր երկրում ավելի շատ մարդ է զոհվում, քան ահաբեկչական գործողություններից»,- նշել է նա, հայտնում է «ՏԱՍՍ»-ը։

Չառլսթոնի իրադարձություններից հետո Օբաման հայտարարել է, որ նմանատեսակ ողբերգությունները Ամերիկայում չափազանց հաճախ են կրկնվում « ու դրա պատճառներից մեկն էլ երկրի քաղաքացիների ձեռքերին հսկայական քանակության զենքի առկայությունն է ; Ամերիկացիները աշխարհի ամենազինված ազգն են։ Բնակչության ձեռքերում, տարբեր գնահատականներով, մոտավորապես 280 մլն միավոր հրազենային զենք կա։

Օբաման ավելի վաղ բազմիցս հանդես է եկել ԱՄՆ –ում զենքի շրջանառությունը խստացնելու կոչերով ու այդ նպատակով մի շարք նախագահական հրամաններ է ստորագրել։ Այս ոլորտում ակտիվ քարոզարշավը Սպիտակ տունը սկսել էր 2012 թ դեկտեմբերին, այն բանից հետո, երբ 20-ամյա Ադամ Լենզան դպրոցում կրակել ու սպանել էր քսան աշակերտների ու վեց մեծահասակի։

Սակայն այդ փաստաթղթերի շուրջ կոնգրեսում իսկական ճակատամարտ էր սկսվել, որում հաղթել էր «զինամթերային» հզոր լոբբին։