ՊԵԿ-ի դեմ արշավը ուղղորդվում է կառավարությունից

ԱԺ փոխնախագահ Ալեն Սիմոնյանի հետ ասոցացվող Araratnews.am-ը մի վերլուծություն է հրապարակել ՊԵԿ պարգևավճարների շուրջ հանրային դժգոհության կապակցությամբ՝ այն որակելով «քարոզչական պատերազմ» ընդդեմ ՊԵԿ-ի և արդեն ձևավորված ավանդույթի համաձայն՝ արշավի կազմակերպման մեջ մեղադրել է նախորդ իշխանություններին:

Եվ իրոք, վերջին օրերին մամուլի և սոցցանցերի հիմնական թեման ՊԵԿ պարգևատրումներ են, ամենաքննադատված անձը՝ ՊԵԿ նախագահը:

Իսկ ի՞նչ է եղել իրականում:

Հունվարի 23-ին Yerevan.Today կայքը հրապարակեց տվյալներ ՊԵԿ աշխատակիցների բազմամիլիոն պարգևատրումների վերաբերյալ, որն արագորեն տարածվեցին տասնյակ կայքերում և սոցցանցերում՝ հարուցելով տարբեր քաղաքական դիրքորոշում ունեցող օգտատերերի դժգոհությունը:

Լուրի հրապարակումից կարճ ժամանակ անց Tert.am-ը հրապարակեց ՊԵԿ նախագահ Դավիթ Անանյանի պարզաբանումը, ըստ որի՝ Անանյանը հերքեց, որ այդ գումարը գոյացել է պարգևավճարի հետևանքով՝ ասելով, թե դեկտեմբերի վերջին աշխատակիցները ստացել են երկու ամսվա աշխատավարձ՝ զուգորդված պարգևավճարներով և հավելավճարով: Եթե պարզեցնենք Անանյանի ասածը, վերջինս չի հերքել, որ ինքն ու իր
ենթականերից ոմանք ավելի քան 8, 9 մլն դրամ աշխատավարձ են ստացել տարերվերջին, այլ հերքել է, որ այդ թիվը գոյացել է հենց պարգևավճարի արդյունքում:

Անանյանի պարզաբանումից հետո թեման էլ ավելի մեծ տարածում գտավ՝ արժանանալով ավելի մեծ քննադատության, քանի որ եթե նախքան պարզաբանումը մարդիկ թերահավատորեն էին մոտենում հրապարակմանը, պարզաբանումից հետո ՊԵԿ նախագահը հերքելով հաստատեց տեղեկությունը: Թեմային անդրադարձան նաև մասնագիտական շրջանակները: Օրինակ՝ փաստաբան Տիգրան Եգորյանը «Ազատության»-ը տված հարցազրույցում մտահոգիչ համարեց ՊԵԿ պարգևատրումների չափը՝ պահանջելով հրապարակել պարգևատրված անձանց ցանկն ու պարգևավճարի չափը: Բայց ՊԵԿ նախագահը լրատվամիջոցների հարցումներին ի պատասխան հրաժարվեց հրապարկել ցանկը՝ հղում անելով անձնական տվյալների գաղտնիության օրենքին, մինչդեռ նշված օրենքում պարգևավճար ստացած անձնացն տվյալների հրապարակման որևէ արգելք չկա:

Մի կարևոր փաստ կա, որի մասին հասկանալի պատճառներով չի խոսվում Araratnews.am-ի հրապարակման մեջ: Տարածվող տեղեկությունների համաձայն՝ ՊԵԿ-ի պարգևատրումների թեման մամուլում հայտվել է հենց իշխանության մեջ գտնվող անձանց միջոցով: Բանն այն է, որ ՊԵԿ աշխատակիցների ստացած միլիոնանոց պարգրավճարները հարուցել են ընդամենը մի քանի հարյուր հազար ստացած բարձրաստիճան պաշտոնայների դժգոհությունը, ովքեր որոշել են այս կերպ «պատժել» Անանյանին՝ հասկացնելով, որ նա ու իր թիմակիցները թեև մյուսներից ավել չեն աշխատել, բայց տասնապատիկ անգամ ավելի գումար են ստացել և իրենք էլ են արժանի համապատասխան խրախուսման: Կոպիտ ասած, չեն թողել, որ ՊԵԿ ղեկավարները «հանգիստ մարսեն» իրենց մի քանի միլիոնանոց հավելավճարները: Ակնառու է, որ իշխանության տարբեր թևերը դիրքավորվելուց հետո փորձում են ընդլայնել իրենց ազդեցությունը, այդ թվում՝ թիմակիցներին վարքաբեկելու միջոցով:

Եվ հիմա, երբ աղմուկը գնալով էլ ավելի է թեժանում՝ արդեն վնասելով կառավարության վարկանիշին, իշխանության ներկայացուցիչները սկսել են Անանյանի դեմ սկսված արշավի պատասխանատվությունը բարդել նախկին իշխանությունների վրա՝ այդ կերպ իրենց վրայից գցելով պատասխանատվությունը: Սակայն դա անում մեղմ ասած «անգրագետ» ձևվով, քանի որ Araratnews.am-ի վերլուծությունից ստացվում է, որ, օրինակ, ՊԵԿ նախագահի հայտարարությունը դապատարտող մեկնաբանություն հրապարակած Azatutyun.am-ը՝ նախկին իշխանության քարոզչամիջոցն է, իսկ տասնյակ հարյուրավոր մարդիկ, ովքեր իրենց օբյեկտիվ դժգոհությունն էին հայտնում ՊԵԿ վարքագծից կա՛մ պատվեր էին կատարում, կա՛մ վերլուծական մտածողություն չունեն:

Ի վերջո, հասրակության լայն շրջանակների դժգոհությունը օբյեկտիվ է. հանրության կողմից ընկալելի չէ, այն, որ արդարության հաստատման պայմանով իշխանության եկած ուժի ներկայացուցիչները սեփական քարտուղարուհիներին միլիոնավոր դրամների պարգևավճարներ են տալիս: Խնդիրը ոչ թե իրավական, այլ բարոյական հարթությունում է: