Խստացում. Կովկասյան ընձառյուծի որս անողները այսուհետ կտուգանվեն ոչ թե 3 մլն, այլ 100 մլն դրամով

Կառավարությունն իր այսօրվա՝ մայիսի 10-ի նիստում որոշեց հավանություն տալ «Բնապահպանական իրավախախտումների հետեւանքով կենդանական եւ բուսական աշխարհին պատճառված վնասի հատուցման սակագների մասին» օրենքում փոփոխության նախագծին, որով բարձրացվում են Կարմիր գրքում գրանցված կրիտիկական վիճակում գտնվող կատվազգիների ընտանիքին պատկանող կովկասյան ընձառյուծի որսի կամ ոչնչացման դեպքում պատճառված վնասի սակագինը։ մասնավորապես, առաջարկվում է նշված կենդանիների որսի կամ ոչնչացման համար վնասի սակագինը 3 մլն դրամից դարձնել 100 մլն դրամ:

Նշենք, որ ներկայում Հայաստանում հաշվառվում է 7-9 ընձառյուծ, որոնց ապրելավայրերն են Արարատի, Վայոց Ձորի եւ Սյունիքի մարզերը:

Դեռեւս 2002-ից սկսած բնապահպանության նախարարությունը եւ Բնության համաշխարհային հիմնադրամի հայաստանյան մասնաճյուղը (WWF Armenia) իրականացնում են Կովկասյան ընձառյուծի պահպանության ծրագիրը Հայաստանում։ Ծրագրի հիմնական նպատակն է անհետացման եզրին գտնվող ընձառյուծի, ինչպես նաեւ նրա համար որս հանդիսացող տեսակների՝ բեզոարյան այծի, հայկական մուֆլոնի եւ այլ տեսակների պոպուլյացիաների ավելացումը, այդ կենդանատեսակների ապրելավայրերի պահպանությունը:

2018 թվականի գարնանը «Խոսրովի անտառ»  պետական արգելոցում Բնության համաշխարհային հիմնադրամի ֆոտոթակարդներն, առաջին անգամ արգելոցի պատմության մեջ, նկարահանեցին կովկասյան ընձառյուծ, որը նախկինում չի արձանագրվել որեւէ ֆոտոթակարդի կողմից։ Բնապահպանության նախարարությունը կարեւորելով վերոնշյալ հանգամանքը՝ 2019 թվականը հայտարարել է կովկասյան ընձառյուծի պահպանության տարի՝ նպատակ ունենալով վեհաժողովների, ֆիլմերի, ցուցահանդեսների կազմակերպման միջոցով բարձրացնել հասարակության իրազեկվածությունը:

Այս օրենքի նախագծով հնարավորություն է ընձեռնվում բնապահպանական իրավախախտումների հետեւանքով կենդանական  աշխարհին պատճառված վնասի հատուցման գումարների մի մասն ուղղորդել համապատասխան տարածքների՝ այդ թվում բնության հատուկ պահպանվող տարածքների առավել լավ պահպանությանն ու վերականգնմանը:

Նախագծի ընդունումը խոչընդոտ կհանդիսանա կովկասյան ընձառյուծի որսի կամ ոչնչացմանը։