Ոստիկանությունն ուսումնասիրում է Մալայան ԲԿ-ում տեսողության խանգարումների դեպքերի վերաբերյալ հրապարակումները

Մալայանի անվան Ակնաբուժական կենտրոնում վարակված աչքի դեղի ներարկման հետևանքով  մի  խումբ քաղաքացիների տեղողության խանգարումներ ստանալու վերաբերյալ հրապարակումների հիման վրա ոստիկանության Մաշտոցի բաժնում  նյութեր են նախապատրաստվում։ Այս մասին NEWS.am–ին հայտնեց ոստիկանության լրատվական վարչության պետի տեղակալ Էդգար Ջանոյանը:

Հիշեցնենք, որ Երեւանում 5  պացիենտներ քիչ է մնացել կուրանան վարակված աչքի դեղի պատճառով, որը ներարկելու հետեւանքով նրանց աչքերում վտանգավոր ինֆեկցիա է ներթափանցել: Ս. Մալայանի անվան Ակնաբուժական կենտրոնի տնօրենի տեղակալ Զառա Մալայանը NEWS.am Medicine-ի թղթակցին հայտնեց, որ դեղն, ըստ նախնական անալիզների, վարակված է աղիքային ցուպիկով:

Տուժածների հարազատների խոսքով՝ խնդիրները սկսվել են Նատալի ֆարմ դեղատնից ձեռք բերված Avastin դեղամիջոցի օգտագործումից հետո:

Նատալի ֆարմ ընկերությունն էլ իր հերթին հայտարարել էր որ  ձեռքբերված Շվեյցարական Ռոշ ընկերության Avastin դեղամիջոցը, որի օգտագործման հետեւանքով մի քանի հոգի բախվել են տեսողության բարդ խնդրի, նախատեսված չէ ներակնային ներարկման համար։

«Տվյալ դեղամիջոցը ըստ ՀՀ-ում գրանցված կիրառման ցուցումների՝նախատեսված չէ ներակնային ներարկման համար և, եթե բժիշկը ստանձնում է դրա ներարկումը, ապա ինքն է ամբողջությամբ կրում բոլոր բարդությունների և կողմնակի ազդեցությունների պատասխանատվությունը»,–ասված է ընկերության տարածած հայտարարությունում։