«Սիրում եմ ինտրիգների էպիկենտրոնում լինել». Էլեն Ասատրյանը՝ նոր հեռուստասերիալում նկարահանվելու և բացասական դերերը հաճույքով խաղալու մասին
LifeԴերասանուհի Էլեն Ասատրյանը, որը վերջերս լսարանին ներկայացավ նաև որպես երգչուհի, շուտով հանդես կգա հեռուստատեսային նոր նախագծում: Ստեղծագործական նորության առաջին մանրամասները դերասանուհին վստահել է Tert.am Life-ին:
Էլենը նկարահանվում է «Շահմարի առեղծվածը» դետեկտիվ հեռուստասերիալում, որը կցուցադրվի Առաջին ալիքի եթերում: Նա նշեց, որ նոր աշխատանքային առաջարկն ընդունելիս կարևորել է ինչպես հեռուստաընկերությունը, որով այն հեռարձակվելու է, այնպես էլ իր կերպարի առանձնահատկությունները:
«Հանրային հեռուստաընկերությունում աշխատելն ինձ համար պատիվ է: Ռեժիսոր Արտյոմ Հարությունյանի հետ չէի աշխատել, բայց գործընկերներիցս շատ էի լսել, որ լավ ռեժիսոր է, ուղղակի մի քիչ պահանջկոտ: Ամեն ինչ կանեմ, որպեսզի աշխատանքը լավ ստացվի. Ես, առհասարակ, կոնֆլիկտային մարդ չեմ ու շատ լավ հարաբերություններ եմ պահում ռեժիսորների ու ամբողջ թիմի հետ»,-ասաց նա:
Էլենը նշեց, որ ֆիլմաշարում կմարմնավորի իրեն հասակակից մի աղջկա, որը նախկինում պարուհի է եղել, սակայն հանգամանքների բերումով հայտնվել է վատ շրջապատում և հրաժարվել սիրելի մասնագիտությունից: «Հերոսուհիս Շողերն է: Նա հայտնվում է տղաների շրջապատում, հանցավոր աշխարհի մեջ: Անընդհատ մութ գործերի ու հանցանքների մեջ է գտնվում, բայց որպես մարդ, իրականում նա այդքան էլ վատը չէ, քանի որ շատ է ուզում ազատվել այդ ամենից, դուրս գալ այդ ճահճից»,-ասաց դերասանուհին:
Դերասանուհու համոզմամբ, նույնիսկ բացասական կերպար մարմանվորելիս կարելի է ինչ-որ կերպ արդարացանել հերոսիդ արարքները, պետք է հասկանալ նրա դրդապատճառները: Նա նկատեց, որ նոր կերպարը նախորդ դերերի հետ որևէ ընդհանուր գիծ չունի, ինչն իր համար բավականին հետաքրքիր է:
«Ես կարծում եմ, որ հանցագործ աշխարհի հետ կապ ունեցող մարդու կերպար կերտելը շատ հետաքրքիր է, որովհետև իրական կյանքում ես հնարավորություն չունեմ ինչ-որ հանցանքներ գործելու, չեմ էլ ուզում:) Առհասարակ, սիրում եմ ինտրիգային կերպարներ, դրական դերերից հաճույք չեմ ստանում։ Գուցե գա ժամանակ, երբ ուզեմ ինչ-որ դրական կերպար կերտել, բայց ինձ գրավեց այս առաջարկը, որովհետև ես սիրում եմ ինտրիգների էպիկենտրոնում լինել, այս կերպարն ինձ ավելի համապատասխան է»,- նշեց Էլենը:
Նա նկատեց, որ հիմնական խաղընկերներին ճանաչում է որպես դերասաններ, սակայն մինչև այժմ անձնական շփման և համատեղ աշխատանքի առիթ չի ունեցել:
«Իմ հիմնական խաղընկերներից է Աշոտ Հակոբյանը, որը մարմնավորում է իմ սիրած տղային: Նրան նույնպես անձնապես չեմ ճանաչում, առաջին անգամ ենք միասին աշխատում, բայց այդ փաստը որևէ խնդիր չի առաջացնում ինձ համար և հաճելի է: Որքան շատ ես անծանոթ մարդկանց հետ խաղում, այնքան ավելի ես կոփվում աշխատանքիդ մեջ, փորձդ մեծանում է, շրջապատդ ընդլայնվում»,-եզրափակեց Էլենը:
1
2
3
4
5
1
2
3
4
5
2
3
