«Ընտանիքը բարձրագույն արժեք է, ամուր պետության հենքն ու երաշխավորը». Հովիկ Աբրահամյան
Header«Փաստ» օրաթերթը գրում է.
Այսօր ամբողջ աշխարհում նշվում է Ընտանիքի միջազգային օրը: Այն սահմանվել է 1993թ. ՄԱԿ-ի Գլխավոր ասամբլեայի կողմից, իսկ Հայաստանի Հանրապետության տոնացույցում ավելացել է 2011թ.ին: Ի դեպ, «ՀՀ տոների և հիշատակի օրերի մասին» օրենքում այս տոնի հավելման գաղափարի հեղինակը եղել է Հովիկ Աբրահամյանը, օրինագծի համահեղինակներ են եղել Գալուստ Սահակյանը, Անահիտ Բախշյանը, Արծվիկ Մինասյանը, Ստյոպա Սաֆարյանը, Լյովա Խաչատրյանը, Արման Սահակյանը, Նաիրա Զոհրաբյանը և Արտյուշ Շահբազյանը:
Տոնի կապակցությամբ երեկ Հովիկ Աբրահամյանը հանդես է եկել շնորհավորական խոսքով, ուր մասնավորաբար ասված է. «Սիրելի՛ հայրենակիցներ.
Սրտանց շնորհավորում եմ բոլորիս՝ Ընտանիքի միջազգային օրվա կապակցությամբ, որը մենք 2011 թվականից օրենքի ուժով ամրագրել ենք Հայաստանում և նշում ենք որպես Ընտանիքի օր: Ընտանիքը բարձրագույն արժեք է, առողջ հասարակության ու ամուր պետության հենքն ու երաշխավորը: Երջանիկ է այն ընտանիքը, որում ազգային ավանդույթների ու ինքնության պահպանմանը զուգահեռ տիրում է իրավահավասարություն, փոխադարձ հարգանք ու փոխըմբռնում:
Անկախ հասարակական հարաբերությունների զարգացման աստիճանից՝ ընտանիքի ամրության գլխավոր նախապայմանը հարգանքն ու փոխզիջումն է. վեճի ամենասուր պահին լռելու ու լսելու կարողությունը, դժվարությունները միակամ հաղթահարելու խիզախությունը, երջանիկ պահերը միասին վայելելու բերկրանքը:
Փորձությունները ժամանակավոր ու անցողիկ են, գլխավորը` դրանք արժանապատիվ հաղթահարելու կարողությունն է: Նույնիսկ առերևույթ անլուծելի թվացող իրավիճակները հեշտ հաղթահարելի են, երբ մարդն իր թիկունքում ունի ընտանիքի սերն ու մտերիմների աջակցությունը: Դա ուժ է, որի դեմ անկարող է ցանկացած հողմ:
Ցավոք, այսօր տեսնում ենք նաև այնպիսի երևույթների անթաքույց քարոզ, որոնք հակասության մեջ են մեր հավաքական պատկերացումների հետ և բացասական ազդեցություն են ունենում հասարակության կարևորագույն բջիջի՝ ընտանիքի կայացման գործում: Փոքր ազգերի համար սա ծանր հետևանքներ ենթադրող խնդիր է: Մեր երկիրն այսօր կանգնած է ժողովրդագրական մարտահրավերի առջև, որի հաղթահարման ամենագործուն միջոցը, իմ խորին համոզմամբ, ամուր և լիարժեք ընտանիքի գաղափարի փառաբանումն է:
Սեր և ներդաշնակություն եմ մաղթում ձեր ընտանիքներին, խաղաղություն Հայաստանին և Արցախին: Աստված բոլորիս պահապան»:
Մանրամասները՝ «Փաստ» օրաթերթի այսօրվա համարում
1
2
3
4
5
1
2
3
4
5
1
2
3
4
5
