Արցախի մարտական հենակետում արտակարգ պատահարից մահացած զինծառայողը տան միակ երեխան էր

NEWS.am-ը գրում է.

ՊԲ հյուսիսային ուղղությամբ տեղակայված զորամասերից մեկի պահպանության տեղամասի մարտական հենակետում արտակարգ պատահարի հետեւանքով սեպտեմբերի 6-ին մահացած զինծառայող Նարեկ Հարությունյանը տան միակ զավակն էր, մայրը նրան մենակ էր մեծացրել: Այս մասին NEWS.am-ին ասացին Նարեկի հարեւանները:

«Հայր չունեն, սոցիալապես անապահով էին, մայրը չէր աշխատում, առողջական լուրջ խնդիրներ ուներ, ուղղակի կարգ չուներ, դրա համար տղային տարել էին բանակ: Հարեւաններով որոշել էինք մորը օգնել, փաստաթղթերը կարգավորել, որ կարգ ստանար, տղան գար, մոտը լիներ, պահեր»,- ասաց հարեւաններից մեկը:

Հարեւանները նշեցին, որ Նարեկը թեեւ չշփվող, ինքնամփոփ, սակայն շատ հանգիստ, հավասարակշռված տղա էր, նա 7 ամիս առաջ էր բանակ զորակոչվել:

Հարեւանների շրջանում տեղեկություններ էին տարածվել, թե մահացու գնդակը ծնոտից վերեւ է անցել, եւ դիտարկվում է ինքնասպանության վարկածը։ Պաշտոնապես այս տեղեկությունը ճշտել չհաջողվեց։

Ավելի վաղ հաղորդել էինք, որ սեպտեմբերի 6-ին` ժամը 01:45-ի սահմաններում, ՊԲ հյուսիսային ուղղությամբ տեղակայված զորամասերից մեկի պահպանության տեղամասի մարտական հենակետում տեղի ունեցած արտակարգ պատահարի հետեւանքով մահացել է ՊԲ զինծառայող, 1996թ. ծնված Նարեկ Արտյոմի Հարությունյանը:

ԼՂՀ  ՊՆ  մամուլի ծառայությունից հայտնում են, որ դեպքի մանրամասները պարզելու համար կատարվում է քննություն: