Ոչ ոք իր հետ չի բերել և իր հետ չի տանում պաշտոնը. Ատոմ Ջանջուղազյան
ՀասարակությունՎերջին շրջանում, մամուլում շրջանառվում են լուրեր այն մասին, թե կառավարությունում լինելու են կադրային փոփոխություններ և նախնական վարկածով՝ Ֆինանսների նախարար Ատոմ Ջանջուղազյանը հրաժեշտ կտա պաշտոնին:
ԼՈւՐԵՐ.com-ը հենց ֆինանսների նախարարից փորձեց ճշտել, թե որքանով է լուրն իրատեսական: Ատոմ Ջանջուղազյանը մեզ հետ զրույցում նշեց, որ պաշտոնական տեղեկատվություն և առհասարակ խոսակցություն այդ թեմայով չի եղել, ապա ժպտալով հորդորեց` հանգիստ վերաբերվել նման լուրերին. «Դուք ի՞նչ եք կարծում, որ ես այնպիսի կարծիք ունեմ, թե որևէ մեկը, այդ թվում և ես, հավերժ պաշտոնավարելո՞ւ ենք: Յուրաքանչյուրն էլ մի օր դադարելու է պաշտոնավարել»,- ասաց նախարարը: Հարցին՝ եթե պարզվի, որ շրջանառվող լուրն իրականություն է դառնում` ինչպե՞ս կվերաբերվեք դրան, նախարարը պատասխանեց.
«Եթե լինի նման բան, ապա յուրաքանչյուր մարդ պետք է պատրաստ լինի իր կարգավիճակի փոփխությանը վերաբերվել համարժեքորեն: Ես կարող եմ շատ հանգիստ վերաբերվել իմ կարգավիճակի փոփոխությանը: Իմ աշխատանքն ինձ համար երբեք չի եղել նպատակ կամ երազանքի իրականացում: Սա ավելի շատ պարտականություն է և ես, իհարկե, իմ տված երդման և պատասխանատվության ստանձման օրվանից փորձում եմ աշխատել լավագույնս: Եթե անհրաժեշտությունը լինի դրա դադարեցման՝ կապ չունի, թե ինչ պատճառով, պետք է դրան հանգիստ վերաբերվել: Ձեզ էլ եմ առաջարկում` հանգիստ վերաբերվեք, ով էլ որ զբաղեցնում է որևէ պաշտոն, նա պարտավոր է լավագույնս ներդրվել, ջանք գործադրել, որպեսզի իր առջև դրված խնդիրները լավագույն լուծումները ստանան: Ոչ ոք իր հետ չի բերել և իր հետ չի տանում պաշտոնը, այդ մասին պետք է ուղղակի չմտածել»,-ասաց Ջանջուղազյանը: Անդրադառնալով նրան, թե ինչով կարող է պայմանավորված լինել իր անվան և իր պաշտոնի շուրջ նման լուրերը, Ատոմ Ջանջուղազյանն արձագանքեց հումորով` գերագնահատում եք, եթե մտածում եք, որ հերիք չի՝ լսել եմ այդ լուրերը, մի հատ էլ դատողություն եմ արել, թե ինչով է դա պայմանավորված:
Այնուամենայնիվ, ֆինանսների նախարարը ընդգծեց, որ ինքն իր պատասխանատվության սահմանում աշխատում է հանդես գալ լավագույնս: Խոսելով ներդրումային ծրագրերից, ֆինանսների նախարարը նշեց, որ կառավարության ամեն նիստին առնվազն մեկ ներդրումային ծրագիր է ներկայացվում. «Ոմանք գուցե չեն ուզում լուսավոր կետերը նկատել, ես նրանց չեմ կարող ոչնչով օգնել, բացի նրանից, որ նրանց առաջարկեմ ձերբազատվեն նման բաներից»,-ասաց նա:
Հարցին, թե որպես ֆինանասների նախարար, ինչ գնահատական կտա տնտեսական հեղափոխության աճին, արդյո՞ք տեմպերը դանդաղ են, կամ գուցե նորմալ հունո՞վ են ընթանում, Ջանջուղազյանը պատասխանեց. «Գիտեք, եթե գնահատական տանք, ապա պիտի գնահատական տանք մեր գործողություններին: Ես կարծում եմ, որ ողջամիտ արագությամբ իրականացվող գործընթաց է: Գնահատական տալով՝ կարծում եմ, որ չենք նպաստի գործընթացին: Եթե իմանամ, որ իմ տված գնահատականից հետո մենք ունենալու ենք մեր երազած Հայաստանը, հենց հիմա կտամ լավագույն գնահատականը, կասեմ իդեալական է: Բայց մենք բոլորս էլ հասկանում ենք, որ մենք հեռու ենք կատարյալ լինելուց, բայց միևնույն ժամանակ պիտի ձգտենք կատարելությանը»,-եզրափակեց ֆինանսների նախարարը:
1
2
3
4
5
1
2
3
4
5
1
2
5
