Ձերբակալվել է Մելիք Մանուկյանի՝ «Շշի Մելոյի» եղբայրը

Երեկ Երեւան֊Սեւան ավտոմայրուղու ճանապարհին տեղի ունեցած պայթյունից հետո դեպքից վայրից  Range Rover մակնիշի մեքենան հեռացնելու գործով ձերբակալվել է ԱԺ նախկին պատգամավոր Մելիք Մանուկյանի (Շշի Մելո) եղբայրը՝ Ռոբերտ Մանուկյանը։

Քննչական կոմիտեի լրատվության հետ կապերի վարչության պետ Նաիրա Հարությունյանը NEWS.am-ին փոխանցեց, որ նա ձերբակալվել է արդարադատության իրականացմանը և քննությանը խոչընդոտելուն օժանդակելու կասկածանքով․ «Ձերբակալվել է Քրեական օրենսգրքի 38-332-րդ հոդվածով նախատեսված արարք կատարելու կասկածանքով»։

Shamhsyan.com-ի տեղեկություններով, Ռոբերտ Մանուկյանի ցուցումով է իր եղբոր՝ «Շշի Մելոյի» Range Rover ավտոմեքենան դեպքի վայրից փախցրել «Շշի Մելոյի» թիկնապահը, որը կարճ ժամանակ անց Կոտայքի մարզի ոստիկանների ու քննիչների կողմից հայտնաբերվել ու բերման էր ենթարկվել, ապա ձերբակալվել:

Ավելի վաղ հաղորդել էինք, որ օգոստոսի 2-ին Երեւան–Սեւան  ավտոմայրուղու վրա տեղի ունեցած պայթյունի հետևանքով վնասվել է կամուրջի եթեւեկելի հատվածը եւ երկու ավտոմեքենա՝ Range Rover մակնիշի 555 LL 05 համարանիշի և Nissan մակինիշի 35 MD 686 համարանիշի։ Range Rover-ը պատկանում է Ազգային ժողովի նախկին պատգամավոր, գործարար «Շշի Մելո» մականվամբ՝ Մելիք Մանուկյանին։

Հիշեցնենք նաեւ, որ մի քաղաքացի,  չենթարկվելով իրավապահների պահանջին, «Ռենջ Ռովերը» հեռացրել էր դեպքի վայրից։ Ոստիկանությունից ավելի ուշ հայտնել էին, որ հարուցվել է քրեական գործ քրեական օրենսգրքի 316-րդ հոդվածի հատկանիշներով՝ իշխանության ներկայացուցչի նկատմամբ բռնություն գործադրելը: