«Ես դրա հավեսը չունեմ, շատ եմ հիասթափվել». Արման Բարդումյան

1990-ականների հայ աստղերի շարքում իր ուրույն տեղն ուներ երգիչ Արման Բարդումյանը: Life.panorama.am-ը հետաքրքրվել է, թե ինչո՞վ է այսօր զբաղվում երգիչն ու թե արդյոք ապագայում հնարավոր է նրան դարձյալ տեսնել բեմում:

«Հիմա կորպորոտիվ միջոցառումների կազմակերպմամբ և հանդիսավարությամբ եմ զբաղվում, այսօր սա իմ աշխատանքն է, ես այլևս չեմ մասնակցում ոչ մի համերգային միջոցառումներին,- նշեց Արման Բարդումյանն ու նկատեց,- այս կյանքում ոչ մի բան կատարյալ չէ, ես էլ չեմ բողոքում, կարևորը առողջ լինելն է»:

Երգիչը զրույցի ընթացքում խուսափեց իր գնահատականը տալ այսօրվա հայկական երգարվեստին, միայն նշեց. «Այսօր ես տանը լսում եմ մեծամասամբ դասական երաժշտություն, իսկ հայ կատարողներից միայն նախընտրում եմ լսել Ռուբեն Հախվերդյանի, Արտավազդ Բայաթյանի և Արթուր Մեսչյանի կատարումները»:

Հեռուստատեսային կամ բեմական գործունեությամբ զբաղվելու մասին Բարդումյանն ասաց, «Ես դրա հավեսը չունեմ, հավատքս կորել է այդ ամենի նկատմամաբ, շատ եմ հիասթափվել, դրա համար այլևս չեմ ուզում երգել: Այո, ես հիմա էլ կարող եմ մի նոր երգ պատրաստել և ներկայացնել, բայց հարցի մեկ այլ կողմն է՝ արդյոք այն եթեր կգնա, և եթե անգամ ստացվի և եթեր գնա այն, միևնույն է, մեզանից ոչ մեկին ոչ մի համերգի չեն կանչի»:

Երգիչը, մեզ հետ զրույցում քննարկելով այսօր համերգների սակավության պատճառները, հայտնեց իր կարծիքը. «Մի քանի տարի առաջ օրենք դուրս եկավ, ըստ որի երգիչները համերգների ժամանակ պետք է երգեն միայն կենդանի ձայնով, և քանի որ ոչ բոլոր երգիչներն են, որ կարող են այդպես երգել, ինքստինքյան երևի ռիսկ չեն անում, սա իմ սուբյեկտիվ կարծիքն է: Կամ էլ գուցե ժողովրդի հավեսն է փախել, չգիտեմ…»,- նշեց նա:

«Ես հստակ կարող եմ ասել, որ այսօրվա հայկական երգարվեստի հիմնադիրները մենք էինք՝ 1990-ակնների աստղերը, մենք իսկապես լավն էինք, մեր երգերը դեռ կապրեն, հիմա էլ մեր երգերի պահանջարկը կա և մարդիկ մինչ այսօր էլ դեռ սպասում ու կարոտում են մեզ,-նշեց Արմանը և հավելեց,- Ընդամենը անցյալ տարի, երբ հաղորդումներից մեկի ժամանակ երգում էինք 90-ակնների աստղերով, դահլիճում ինձ համար մի կարևոր բան նկատեցի՝ մարդիկ կային, ովքեր արտասվում էին, քանի որ նոստալգիա ապրեցին»:

Այսօր հայկական երգարվեստում չլինելով հանդերձ Արման Բարդումյանը պատմեց, որ ամբողջովին չի հեռացել երգից. «Ես շատ լավ կապ ունեմ ռուսական արտիստների հետ, որոնցից մեկի հետ անգամ զուգերոգ ունեմ, խոսքը Ռուսաստանի Դաշնության ժողովրդական արտիստ Դմիտրի Պևցովի մասին է: Ես սրա մասին մի անգամ ասել եմ եթերով, բայց դրանով ոչ մեկ չհետաքրքրվեց»:

Խոսելով իր ընտանիքից՝ երգիչը պատմեց, որ ունի երկվորյակ տղաներ, ովքեր շուտով չորս տարեկան կդառնան: Հարցին՝ կցանկանա արդյոք, որ որդիները ընտրեն հայրիկի ուղին, Բարդումայնը նշեց, «Բացարձակ, որպես կանոն այս ասպարեզի մարդիկ չեն ուզում, որ իրենց երեխաները շարունակեն իրենց ուղին: Իհարկե, կյանքն առջևում է, գուցե նրանք իսկապես ցանկանան և երգեն, բայց ես կոնկրետ դեմ եմ դրան»: