Մալիշկան մերժեց մետաղական հանքարդյունաբերությունը. Ավագանին ուղերձ է հղել

Վայոց Ձորի Մալիշկա գյուղը դարձավ 5-րդ համայնքը մարզում, որի բնակչությունը հանրագրով մերժեց մետաղական հանքարդյունաբերությունը: Մալիշկայի ավագանին հանդես է եկել ուղերձով, որտեղ մասնավորապես, ասվում է.

«Սույն թվականի օգոստոսի 8-ին Մալիշկա համայնքի թվով 700 բնակիչների ստորագրությամբ համայնքապետարանին է ներկայացվել «Մալիշկա համայնքը էկո-տնտեսական տարածք դարձնելու եւ համայնքում մետաղական հանքարդյունաբերությունն արգելելու վերաբերյալ» հանրագիր:

Ըստ այդ հանրագրի՝  բնակիչները խնդրում եւ պահանջում են՝

ա) ապագայում արգելել եւ բացառել Մալիշկա համայնքի վարչական տարածքում մետաղական հանքարդյունաբերության հետ կապված հետախուզական, առավել եւս հանքավայրերի շահագործման աշխատանքների իրականացումը,

բ) hամայնքի անդամներին ներգրավելով՝ մշակել Մալիշկայի եւ Վայոց ձորի մարզի էկոլոգիապես կենսակայուն եւ կանաչ տնտեսության զարգացման համալիր ծրագիր՝ հաշվի առնելով Վայոց ձորում գյուղատնտեսության, անասնապահության, խաղողագործության, գինեգործության, էկոտուրիզմի զարգացման լայն հնարավությունները, ինչպես նաեւ հանրապետության պատմամշակութային եւ զբոսաշրջության կարեւոր կենտրոն լինելը:

Վերոնշյալ պահանջների իրականացման համար համայնքի բնակիչները պատրաստ են աջակցել ՀՀ պետական կառավարման եւ տեղական ինքնակառավարման մարմիններին:

Մալիշկայի ավագանին 09.09.2019թ.-ին կայացած նիստով ուղերձ է հղում ՀՀ կառավարությանը եւ Վայոց ձորի մարզպետին:

Վայոց ձորի մարզում եւ Մալիշկա համայնքի վարչական տարածքում մետաղական հանքարդյունաբերության հետ կապված հետախուզական եւ հանքավայրերի շահագործման աշխատանքների իրականացման պարագայում հաշվի առնել տարածաշրջանի պատմամշակութային եւ զբոսաշրջության կենտրոն լինելը, մասնագիտական-փորձագիտական կազմակերպությունների, բնապահպանների կողմից կատարված ուսումնասիրությունները, եզրակացությունները եւ համայնքի բնակիչների՝ հանրագրով ներկայացված պահանջները, առաջարկությունները եւ մտահոգությունները»: