«Մեր սպայի կյանքը շատ կարեւոր է». Սուրեն Պապիկյանը՝ Վայոց Ձորում տեղի ունեցած միջադեպի եւ մարզպետի հրաժարականի մասին

Վայոց Ձորի մարզպետը հստակ նշել է, թե որն է իր հրաժարականի պատճառը. ստեղծված իրավիճակը, նաեւ այն, որ այսօր հիվանդանոցում ունենք սպա, ով միջադեպի հետեւանքով պայքարում է կյանքի համար,  մարզպետը քաղաքական որոշում է ընդունել, որ ինքն այլեւս նպատակահարմար չի համարում իր հետագա պաշտոնավարումը՝ անկախ նրանից, թե քննությունն ինչ է պարզելու ու ինչ արդյունք է լինելու: Այս մասին, այսօր՝ սեպտեմբերի 26-ին, լրագրողների հետ զրույցում նշեց տարածքային կառավարման եւ ենթակառուցվածքների նախարար Սուրեն Պապիկյանը:

«Հիմա մեր սպայի կյանքը շատ կարեւոր է: Նաեւ բոլորի հավասարությունն օրենքի առջեւ պետք է հստակ լինի՝ թե մարզպետի, թե սպայի, թե հասարակ քաղաքացու»,-ասաց նա:

Հարցին, թե արդյոք քննարկվում է մարզպետւ թեկնածուների հարցը, Պապիկյանը պատասխանեց. «Մարզպետը հայտարարել է, որ քանի որ այս պահին ընթանում են զորավարժություններ, ինքը լիազորությունները վայր է դնելու այդ գործընթացի ավարտից հետո: Երբ կունենանք մարզպետի թափուր տեղ, բնականաբար, համապատասխան ընթացակարգով վարչապետը կորոշի, թե ով է լինելու Վայոց Ձորի մարզպետը»:

Դիտարկմանը, թե ինքը գոհ է համայնքապետերի աշխատանքից, Սուրեն Պապիկյանը նկատեց, որ համայնքի ղեկավարի պաշտոնները ընտրովի են եւ այն, թե ինչպիսի պաշտոնյա է համայնքի ղեկավար, դա հենց այդ համայնքի խնդիրն է: «Մենք կարող ենք համայնքի ղեկավարից լինել գոհ կամ դժգոհ, բայց առաջին հերթին դրա շահառուն տվյալ համայնքի բնակիչն է: Բնակիչն է որոշելու, թե ով է լինելու իր համայնքի հաջորդ ղեկավարը: Իմ կոչն է համայնքապետերին՝ իրենց ենթակայության ներքո գտնվողն պաշտոններում նշանակումներում լինել հետեւողական, որ այդտեղ լինեն մարդիկ, որոնք օժտված են համապատասխան կարողություններով»:

Ավելի վաղ NEWS.am-ը հայտնել էր, որ 2019թ. սեպտեմբերի 17-ին՝ ժամը 23:40-ի սահմաններում, Եղեգնաձոր քաղաքի շենքերից մեկի բակում փոխգնդապետ Արա Մխիթարյանի և Վայոց Ձորի մարզպետի օգնական Հարություն Գրիգորյանի մասնակցությամբ ծեծկռտուք է տեղի ունեցել: Ենթադրյալ հանցագործություն կատարած անձը, ով Եղեգնաձոր քաղաքի 28-ամյա բնակիչ է, զանգով նրան աջակցելու համար այնտեղ եկած 3-4 անձ փորձել են պարզաբանումներ ստանալ, որից հետո նրանց միջեւ սկսած ծեծկռտուքի ժամանակ ծեծի են ենթարկել սպաներին: Ենթադրյալ հանցագործը բռունցքով մեկ անգամ հարվածել է սպայի գլխին, որի հետեւանքով վերջինս վայր է ընկել: 28-ամյա երիտասարդը ձերբակալվել է, նրան մեղադրանք է առաջադրվել:

Նախաքննությամբ պարզվել է, որ նշված վիճաբանության ժամանակ բացի վերը նշված սպայից մարմնական վնասվածքներ են ստացել նույն զորամասի եւս երկու սպա:

Կան տեղեկություններ, որ միջադեպին մասնակցել է նաեւ Վայոց Ձորի մարզպետ Տրդատ Սարգսյանը: Միջադեպին մարզպետի հնարավոր մասնակցությունը ստուգվում է:

Փոխնդապետը տեղափոխվել է հիվանդանոց՝ «Փակ ծանր ԳՈՒՎ. գլխուղեղի աջ կիսագնդի միջին աստիճանի սալջարդ, աջ քունք-գագաթային, ճակատային բլթերի շրջանի սուբդորալ հեմատոմա՝ արտահայտված քունքտենտորյալ լատերալ դիսլոկացիայով» նախնական ախտորոշումով: Կատարվել է շտապ վիրահատություն, վիճակը գնահատվում է ծայրահեղ ծանր: Նա կոմայի մեջ է:

Մարզպետ Տրդատ Սարգսայանը հայտարարել է, որ պատրաստվում է վայր դնել լիազորությունները: