Առկա բյուջեի պայմաններում նույնիսկ հնարավոր է լուծել համայնքի խնդիրները․ Փարաքար համայնքում ընտրություններ են

Այսօր ՀՀ մի շարք մարզերում տեղական ինքնակառավարման մարմինների ընտրություններ են անցկացվում։ Արագածոտնի, Արարատի, Արմավիրի, Գեղարքունիքի, Լոռու, Տավուշի և Շիրակի մարզերի 19 համայնքում, որոնցից 13-ում ընտրությունները հերթական են, իսկ 6-ում՝ արտահերթ։

Հերթական ընտրությունն է Արմավիր մարզի Փարաքար համայնքում, որտեղ առաջադրված է 4 թեկնածու՝ Փարաքարի ավագանու անդամ Դավիթ Մինասյանը, Սամվել Ավետիսյանը, համայնքի գործող ղեկավար Սամվել Վարդանյանը և նրա տեղակալ Սարդուր Թևոսյանը։

Փարաքարի համայնքապետի  թեկնածու Դավիթ Մինասյանը լրագրողների հետ զրույցում նշեց, որ եկել է ընտրության` հանուն բարեկարգ Փարաքարի։ Նրա խոսքով՝ համայնքի խնդիրները հասկանալու համար հարկավոր է պարզապես շրջել Փարաքարով ու Թաիրովով, և բոլորը կտեսնեն ոչ կանաչապատ տարածքներ, կեղտոտ փողոցներ, անբարեկարգ ճանապարհներ և այլն։

«Այսքան տարի քաղաքացու համար տեսանելի է, թե ինչ է փոխվել, կարող եք ինքներդ շրջել ու տեսնել, թե փոխելու ինչքան բան կա։ Ամեն ինչ  հերթով կանենք, նախընտրական ծրագրումս պուպուլիստական խոստումներ չեմ տվել։ Հավատացնում եմ ձեզ՝ Փարաքարի առկա բյուջեի պայմաններում նույնիսկ հնարավոր է լուծել համայնքի առաջ ծառացած խնդիրները»,- ասաց նա։

Դիտարկմանը, որ գործող գյուղապետ Սամվել Վարդանյանը հայտարարել է, որ ավագանու անդամ եղած ժամանակ դուք որևէ նախագիծ չեք ներկայացրել, կարծիք չեք հայտնել, նա արձագանքեց․ «Ի՞նչ եք մտածում ինձ հետ պայքարող թեկնածուն իմ մասին ի՞նչ պիտի ասեր, տարօրինակ կլիներ, եթե լավ արտահայտվեր»։

Մինասյանը, խոսելով իր դատվածության մասին, նախ նկատեց, որ ապատեղեկատվություն  է տարածվում հոդվածի հետ կապված։

«Մարմնական վնասվածք հասցնելու համար, բոլորը գիտեն իմ համայքնում, որ փորձել եմ փրկել ընկերոջս կյանքը։ Ես դա չեմ հերքել, բայց դա կյանքի միակ և վերջին դեպքն է եղել, իսկ այդ ժամանակ երիտասարդ եմ եղել։ Ես եմ արդեն մոռացել, թե 10 տարի առաջ ինչ եղել, բայց ոմանք ակտիվ հիշում են ու շահարկում»,- շարունակեց  Դավիթ Մինասյանը։