Բերանի անկյունների ճաքերից, ստոմատիտից մինչև կոնյուկտիվիտ և տեսողության խանգարումներ. ահա, թե որքան վտանգավոր կարող է լինել վիտամին B2 -ի անբավարարությունը. ինչպես լրացնել պակասը

Վիտամին B2-ը (ռիբոֆլավին) շատ կարևոր դեր ունի մարդու օրգանիզմի համար, այն մասնակցում է աճման, աշխաջրերի, ճարպերի, սպիտակուցների փոխանակությանը, ինչպես նաև կարգավորում է կենտրոնական նյարդային համակարգի գործունեությունը, ներգործում աչքում տեղի ունեցող փոխանակության վրա, ապահովում է լուսային և գունային տեսողությունը: Վիտամին B2-ի միակ աղբյուրը սնունդն է: Դրա անբավարարության մասին վկայում են հետևյալ նշանները.

• բերանի անկյունների ճեղքվածքները և կեղևիկները (անգուլյար ստոմատիտ),
• գլոսիտը (լեզվաբորբ),շրթունքների կարմիր երիզը,
• մազաթափությունը
• դերմատիտը
• գլխացավ
• թուլություն
• առանց պատճառի նիհարելը

Առավել բարդացած դեպքերում կարող են նկատվել.

• կոնյունկտիվիտ,
• բլեֆարիտ,
• լուսավախություն,
• տեսողության մթնաշաղային խանգարում։

Որպես կանոն B2 հիպովիտամինոզը մեկուսի չի լինում։ Հաճախ նկատվում է B պոլիհիպովիտամինոզներ։ Ախտորոշումը հաստատվում է կենսաքիմիական հետազոտությունների տվյալներով (օրվա մեզում, արյան մեջ և էրիթրոցիտներումռիբոֆլավինի պարունակության որոշումով)։

Վիտամին B2 պարունակում են ձուն, պանիրը, կաթը, միսը, ոսպը, սոյան, կանաչ ոլոռը, խմորասնկերը, ինչպես նաև տանձը, դեղձը, գազարը, լոլիկը, ճակնդեղը, ծաղկակաղամբը և այլն:Կաթնաթթվային բակտերիաները սինթեզում են վիտամին B2:

Ռիբոֆլավինը շատ զգայուն է ուլտրամանուշակագույն ճառագայթների նկատմամբ, ուստի դրա պատրաստուկները և սննդամթերքը պետք է պահել արևի ճառագայթներից պաշտպանված տեղում: Խոհարարական մշակման հետևանքով B2-ի փոքր քանակություն է կորչում: Մթերքները չորացնելիս, մանրէազերծելիս, բանջարեղենը և միսը եփելիս կորչում է վիտամինի մոտ 20 %-ը:

Բուժման համար տրվում է լիարժեք սնունդ՝ խմորասնկեր, լյարդ, երիկամներ, ձվի դեղնուց, արախիս, պանիր։ Ներքին ընդունման ձևով 0,003-0,005 գ օրը 3 անգամ նշանակվում է ռիբոֆլավին, իսկ ծանր ձևերի դեպքում՝ օրը մինչև 0,05-0,07 գ: Միաժամանակ տրվում են B խմբի այլ վիտամիններ։