Դուք ի՞նչ քաղաքական գործիչներ եք, ի՞նչ պայքարողներ և ի՞նչ հեղինակություն ունեք, որ ձեր հետևից ՀՀ քաղաքացին գա

Ռոբերտ Մելքոնյանը ֆեյսբուքյան իր էջում գրում է .

Ժառանգություն կուսակցության կենտրոնական գրասենյակում վերջերս ազդարարվեց «Նոր Հայաստան» ճակատի կազմակերպման մասին: Ինչ անուն ասես չեն մոգոնում, հնարում, մեկը մյուսից ճոռոմ ու ամպագոռգոռ… Մինչ այս ճակատը գործում էր «Հանրային փրկության ճակատ» անունով:

Այս նորաստեղծ կամ վերակազմավորված ճակատի մեջ են Ժառանգությունը, Ժողովրդավարական հայրենիքը, Հիմնադիր խորհրդարանը, «Ոտքի՛, Հայաստանը», Հայաստանի քաղաքագետների միությունը:

Ձեզ որևէ բան ասացի՞ն այս անուները, ի՞նչ զգացում ունեցաք՝ հիշելով դրանց առաջնորդներին ու դրանց ակտիվիստներին…Հիշեցի՞ք այդ «կարկառուն գործիչներին», նրանց պայքարը, արշավանքները, «քաջագործությունները», սադրանքները, միամիտ ու անմտածված, պարզունակ քայլերն ու ձախողումները: Հիշեցի՛ք, հաստատ հիշեցի՛ք… Հիշեցիք ու զարմացա՞ք այս մարդկանց վրա… Ես էլ…

Բայց ես ոչ միայն զարմացա, այլ նաև զայրացա… Սրանք նման են դասը չիմացող կամ վատ յուրացրած աշակերտի, որը համառորեն իրեն գցում է գրատախտակի մոտ դաս պատասխանելու՝ մոռանալով իր մտավոր անկարողությունների մասին… Հույսը դնելով դասարանի հուշարարների ու բարի պատահականության վրա…
Ախր դուք ի՞նչ քաղաքական գործիչներ եք, ի՞նչ պայքարողներ և ի՞նչ հեղինակություն ունեք, որ ձեր հետևից ՀՀ քաղաքացին գա… Դուք չեք նկատո՞ւմ, որ սպառել եք վստահության, հավատի ու հավատ ներշնչելու բոլոր չափաբաժինները… Եթե այդ պարզ բանը դուք և մյուս «Ոչ»-ականները չեք հասկանում, ապա իրոք դուք բոլորդ պրոբլեմներ ունեք… Ես կասեի՝ շատ լուրջ պրոբլեմներ…

Ախր շատ տարբեր եք ու այլազան, տարատեսակ ու տարաբնույթ, ձեր գլուխը, ինչպես նախորդ միությունների դեպքում մի ղազանում հաստատ չի եփվի… Մեկը շատ շուտ եփվող է, մյուսն՝ արդեն փչացած` անհամ, մյուսն ինչքան եփես՝ հում է մնալու, մյուսներն էլ՝ չուտվող ու քյալ, բնությանն անհայտ երևույթ… Բայց իրոք մի բան ընդհանուր է, դուք բոլորդ իրար արժեք…

Իսկ որ ՀՀ քաղաքացիներն էլ իրոք ինչ-որ փոփոխություններ, տնտեսական-սոցիալական-բարոյական բարվոք վիճակ են երազում, դա էլ ճիշտ է… Որ հոգնել են արդեն լկտիացած ու հաբռգած որոշ պաշտոնյաներից ու իրավապահ-մաքսա-հարկայիններից, դա էլ է ճիշտ… Սա արդեն խնդիր է և անշուշտ լուրջ խնդիր, ու լրջորեն զբաղվելու և ի վերջո հետևություններ անելու ժամանակն է… Անհետաձգելի ու անհապաղ…