Սթափվե՞լ են ընդիմադիրները

Կարեն Մկոյանը ֆեյսբուքյան իր էջում գրում է .

Արդեն տևական ժամանակ է, ինչ քաղաքական դաշտում սահմանադրական փոփոխությունների թեմայի շուրջ քննարկումները զարգանում են: 
Ինչքան մոտենում է բուն հանրաքվեի՝ այո թե ոչ-ի բեկումնային օրը՝ եռուզեռն այս հարցի շուրջ էլ ավելի է թեժանում:

Ինչպես տեսնում ենք, փոփոխությունների երկու հիմնական «պատասխանների» կողմնակիցների բանակը որոշակի վերադասավորումների է ենթարկվում:

ՎՍԴՀԿ ատենապետ, ԱԺ ՀԱԿ խմբակցության պատգամավոր Լյուդմիլա Սարգսյանն այսօր հանդես է եկել հարցազրույցով: 
Վերջինս ներկայացրել է ՎՍԴՀԿ-ի առաջիկա ծրագրերը, նպատակները: Անդրադարձ է եղել նաև սահմանադրական բարեփոխումների դեմ ձևավորված «Նոր Հայաստանի» և «Ոչ»-ի շարժումներին: Սարգսյանը նշել է. ««Նոր Հայաստան» ճակատը ոչ մի նոր բան չասաց, կրկնեց այն, ինչ իրենց առաջին համաժողովի ժամանակ էին ներկայացրել: Ես այդտեղ ծրագիր չտեսա: Ինչ վերաբերում է «Ոչ»-ի ճակատի և «Նոր Հայաստան» ճակատի համատեղ գործողություններին, ես միայն ուրախ եմ»:

Անդրադառնալով այս ուժերի կողմից իրականացվելիք գործողություններին՝ Սարգսյանը նշել է. «Ես չեմ տեսնում այն բավարար ռեսուրսները, որոնք կարող են բերել բեկումնային փոփոխության: Չեմ կարծում, որ ապրում ենք այն իրավիճակում, երբ մեր խոսքերը պետք է հենց էնպես մսխենք, և ասենք այն, ինչ չենք կարող անել, ժողովրդին դիմենք կոչերով, որոնք հետո չեն արդարացվելու»:

Սարգսյանի ասածը թերևս նորություն չէր, սակայն հարկ եմ համարում ուշադրություն դարձնել երկու կարևոր բաղադրիչների վրա: Փաստացի ընդիմությունը սկսում է խոստովանել, որ փոշիացրել է այն, ինչ տարիների ընթացքում կուտակել էր: Տարբեր ժամանակշրջաններում եղել են որոշակի անհատներ, ովքեր քիչ թե շատ վայլել են ժողովրդի համակրանքը, սակայն, տարիների ընթացքում այդ ներուժը վերջնականապես մաշվել է:
Երկրորդ, շատ կարևոր տենդենց է նկատվում: Ընդիմադիր գործիչները սկսել են իրավիճակին առավել սթափ մոտենալ, առանց լրացուցիչ դեմագոգիայի: Ժամանակն է արդեն գիտակցել, որ ժողովրդի մոբիլիզացաման տեսնակյունից նման գործելաոճը չաշխատող հնարք է դարձել: