Կին քաղաքական գործչի իմիջի վերլուծություն Արփինե Հովհաննիսյանի օրինակով

Անի Հակոբյանը ֆեյսբուքյան իր էջում գրում է .

Ինչ է իմիջը

«Իմիջ» հասկացությունը ծագել է լատիներեն «imago»` «պատկեր, կերպար, ձև» բառից և ներկայումս ընկալվում է որպես զանգվածային գիտակցության մեջ գոյություն ունեցող որոշակի օբյեկտի կարծրացած կերպար: 

Որպես կանոն, իմիջ հասկացությունը վերաբերում է կոնկրետ անձի, սակայն կարող է տարածվել նաև անհատների որոշակի խմբի, կազմակերպության, ապրանքի վրա և այլն: Իմիջի հիմքում ընկած է այն դերերի համակարգը, որոնք անձը խաղում է իր կյանքում: Վերջինս ընդգրկում է բնավորության գծերի առանձնահատկությունները, արտաքին տվյալները, հագուստը և այլն:

PR-ի շատ մասնագետներ այսօր իմիջը սահմանում են որպես գրավչության արվեստ, ուրիշի հայացք, անձի ընկալում ուրիշի կողմից, անհատի հասարակական «ես», նկար դրսից, որը գովազդում է այն, ինչ ներսում է, խոշորացնող հայելի, որն արտացոլում է անձի գործարար և անձնական որակները:

Ինչպես է ձևավորվում իմիջը

Ընդհանրապես իմիջը ձևավորվում է 2 տեսակի ինֆորմացիայի հիման վրա`

1. Ինֆորմացիա, որը հենց անձն է տալիս իր մասին` հագնվելու ոճ, արտաքին տեսք, դիմահարդարում, սանրվածք, վարվելակերպ, խոսելաոճ, ժեստեր, մասնագիտական գրագիտություն, նախաձեռնողականություն և այլն:

2. Միջնորդավորված տեղեկատվություն, այսինքն՝ անձի մասին երրորդ ձեռքից ստացված ինֆորմացիա` ասեկոսեներ, բամբասանքներ, կարծիքներ և այլն:

Հիմա փորձենք այս երկու տեսակի ինֆորմացիաները համադրելով՝ վերլուծել հայաստանյան քաղաքական դաշտում ամենավառ կերպարներից մեկի` Արդարադատության նորանշանակ նախարար Արփինե Հովհաննիսյանի կերպարը: 

Քանի որ Հայաստանում միջնորդավորված տեղեկատվության, բամբասանքների ու ասեկոսեների ինստիտուտը, մեղմ ասած, ուռճացված է ու գրեթե միշտ չի համապատասխանում իրականությանը, կփորձենք շրջանցել այն և ավելի շատ կենտրոնանալ արտաքին տեսքի վրա:

Ինչպես պետք է հագնվի կին քաղաքական գործիչը

Ինչպես պետք է հագնվի կին քաղաքական գործիչը, որպեսզի շրջապատի ուշադրությունը չկենտրոնացնի իր հագուկապի վրա, այլ մասնագիտական որակների: Պատասխանը մեկն է` նա պետք է հագնվի գործնական ոճին համապատասխան: Բայց, արի ու տես, որ  գործնական ոճ բառակապակցությունը լսելիս մենք միանգամից պատկերացնում ենք անդեմ կանանց և տղամարդկանց` սև կոստյումով ու սպիտակ վերնաշապիկով, մեծ գործնական պորտֆելներով, դեմքի ձևին չհամապատասխանող ակնոցներով, ովքեր խոսում են շատ քիչ և հիմնականում շատերի համար անհասկանալի մասնագիտական լեզվով: Ինչ-որ տեղ այս ասոցիացիաները ճիշտ են, որովհետև մենք դա ենք տեսել և՛ մեր շրջապատում, և՛ ֆիլմերում, ամսագրերում ու ամեն տեղ, որտեղ խոսվել է գործնական ոճի մասին:

Իրականությունը փոքր-ինչ այլ է: 

Գոյություն ունի գործնական ոճի 3 տեսակ`

• ֆորմալ գործնական կամ Business Forma

• կառավարող (Management ) գործնական կամ Executive business casual (Modern Business)

• ոչ ֆորմալ գործնական կամ Business casual

Արփինե Հովհաննիսյանը շատ գրագետ կերպով կարողանում է համադրել գործնական ոճի այս երեք տեսակները:

Ֆորմալ գործնական ոճ

Սա գործնական ոճի ամենապահպանողական, համարձակ քայլեր բացառող և ինչ-որ տեղ ձանձրալի տեսակն է: Այն իրենից ենթադրում է`

• հանգիստ գույներ

• պարտադիր պիջակ. տաբատ+պիջակ, մինչև ծնկները հասնող կամ միդի ուղիղ շրջազգեստ+պիջակ, վերնաշապիկ+կիսաշրջազգեստ+պիջակ

• տաբատը պետք է թույլ լինի և ոչ մի դեպքում չընդգրկի մարմինը

• անկախ եղանակից՝ վերնաշապիկը և պիջակը պետք է երկարաթև լինեն

• զուգագուլպան պետք է լինի մարմնագույն և ոչ մի նախշ չպարունակի
• կոշիկները պետք է լինեն դասական ոճի, անպայման փակ դիմային մասով և ոչ շատ բարձր կրունկով

• այս ոճի ժամանակ մազերը պետք է պարտադիր հավաքված լինեն, ազատ թափված մազերն անընդունելի են:  Արփինե Հովհաննիսյանն այս կետը չի պահում, նրան ավելի հաճախ կարելի է հանդիպել թափված մազերով, քան հավաքած սանրվածքով:
• դիմահարդարումը պետք է լինի որքան հնարավոր է քիչ կամ բնականին մոտ՝ «no make-up» make-up: Անթույլատրելի են շրթներկի կամ ստվերաներկի վառ գույները:

• Զարդերը պետք է լինեն զուսպ, փոքր չափերի, գրեթե չնկատվող: Արփինե Հովհաննիսյանն այս կետին ևս միշտ չէ, որ  հետևում է, քանի որ նրա զարդերը բավականին աչքի ընկնող և վառ են:

Կառավարող (Management) գործնական ոճ

Այս ոճի դեպքում սահմանափակումները կրկնակի քիչ են: Այստեղ կարելի է ընդգծել անձի անհատական առանձնահատկությունները:

• ողջունելի են վառ գույները և նախշերը, իհարկե չափի մեջ
• պիջակը պարտադիր չէ, դրան կարող է փոխարինել ժիլետը կամ գեղեցիկ գույնի ժակետը

• կիսաշրջազգեստի կամ շրջազգեստի երկարության պահանջները նույնն են, այն պետք է լինի ծնկից կամ շատ քիչ բարձր կամ միդի
• շոգ եղանակին թույլատրվում է կարճ թևերով վերնաշապիկ կամ պիջակ
• զուգագուլպան պարտադիր է, մերկ ոտքերն անթուլյատրելի են
• կրկին ցանկալի է բնականին մոտ դիմահարդարումը, բայց թույլատրելի է նաև վառ շրթներկը

• զարդերը կարող են լինել մի քիչ խոշոր և վառ գույների

Ոչ ֆորմալ գործնական ոճ

Գործնական ոճի ամենաազատ տեսակն է, այն չունի հստակ պահանջներ:

• կտորի, ինչպես նաև նախշերի ընտրությունն ազատ է:
• պիջակի կամ ժակետի առկայությունը պարտադիր չէ:
• կիսաշրջազգեստի և շրջազգեստի երկարության պահանջները նույնն են: 
• կոշիկը կարող է լինել բաց դիմային մասով:
• թույլատրելի են վառ գույների շարֆիկներն ու խոշոր վզնոցները:
• դիմահարդարումը կարող է վառ լինել:

Գործնական ոճը ԲԱՑԱՌՈՒՄ Է`

• սպորտային շապիկներ
• տարբեր տեսակի նկարներով ու գրվածքներով շապիկներ
• սպորտային կոշիկներ
• կաշվե հագուստ
• կարճ կիսաշրջազգեստ
• շորտեր
• լեգինսներ
• ջինսեր

Ինչպես տեսնում ենք՝ Արփինե Հովհաննիսյանը շատ գրագետ կարողանում է համադրել գործնական ոճի բոլոր 3 տեսակները: Իհարկե, նա դրանք հաճախ է խառնում իրար, բայց երբեք դուրս չի գալիս թույլատրելիի սահմաններից: Նրան այս առումով կարելի է բացառություն համարել մեր կին քաղաքական գործիչների շրջանում: 

Մի մոռացեք, որ իմիջը դրսից գովազդում է այն, ինչ ներսում է:

Լուսանկարները` ՀՀ արդարադատության նախարարության ֆեյսբուքյան էջից