Նոր շունչ ավիափոխադրումների ոլորտում

Տնտեսական անկյունը ֆեյսբուքյան իր էջում գրում է .

Մշտապես խոսվում է ավիացիոն և թռիչքային անվտանգության մասին: Այսօր կայացած գործադիրի նիստում հավանության է արժանացել ՀՀ կառավարության և Լյուքսեմբուրգի Դքսության կառավարության միջև 2000թ. նոյեմբերի 21-ին նախաստորագրված «Օդային հաղորդակցության մասին» վերանայված համաձայնագրի կնքումը: Վերջինիս անհրաժեշտությունը պայմանավորված է ավիաընկերությունների նշանակման մասով ԵՄ օրենսդրությամբ սահմանված իրավունքների անհամապատասխանությամբ, մասնավորապես՝ լրամշակման կարիք ունեին ավիացիոն և թռիչքային անվտանգության հոդվածները:

Հարկ է նշել, որ հիմք ընդունելով 2014 թ. ՀՀ կառավարության կողմից քաղաքացիական ավիացիայի ոլորտում որդեգրված «Բաց երկնքի» քաղաքականությունը, որը ենթադրում է ավիաընկերությունների առևտրային գործունեությանը պետության միջամտության նվազեցում` առաջացած հակասությունները վերացնելու նպատակով անհրաժեշտություն է առաջացել արդեն իսկ ուժի մեջ մտած Համաձայնագրի վերանայում: Քանի որ գործող համաձայնագրի տեքստում առկա են ավիաընկերության առևտրային գործունեությանը խոչընդոտող մի շարք դրույթներ` թույլատրելով պետությունների միջամտությունը ավիաընկերությունների կողմից առաջարկվող տարողության, հաճախականության և սակագների հաստատման մասով, առկա են սպասարկվող ուղղությունների սահմանափակումներ:

Նոր նախագծի հիմնական նպատակը որդեգրված քաղաքականության և Եվրոպական համայնքի հետ կնքված համաձայնագրի դրույթներին համապատասխանեցնելն է:

Հատկանշական է, որ, այս ամիս կնքվել էր օդային ոլորտը կարգավորող ևս երկու փաստաթուղթ՝ «ՀՀ կառավարության և Բուլղարիայի Հանրապետության կառավարության միջև օդային հաղորդակցությունների մասին» և «ՀՀ և Արաբական Միացյալ Էմիրությունների կառավարության միջև միմյանց համապատասխան տարածքների միջև և դրանցից դուրս օդային հաղորդակցության մասին» համաձայնագրերը:

Սպասվում է, որ վերը նշված փոփոխությունների ու կնքված համաձայնագրերը կնպաստեն ոլորտի ազատականացմանը և մատուցվող ծառայությունների որակի բարձրացմանը: