Ադրբեջանական պոռոտախոսություն
Blog
Նարեկ սարգսյանը ֆեյսբուքյան իր էջում գրում է.
Վրաստանի փոխվարչապետ և էներգետիկայի նախարար Կախաբեր Կալաձեն հայտնվել է ադրբեջանական տխրահռչակ լրատվական կայքի հարձակման թիրախում: «Ոխերիմ» հարևանները հատկապես զայրացել են, որ ռուսական և իրանական գազի ներհոսք ակնկալող վրացի նախարարն այդ թեմայով երկու անգամ բանակցելով «Գազպրոմի» ղեկավարի հետ` տվել է Հայաստանի անունը: Իրականում Կալաձեն միայն ասել է, որ ռուսական գազը Հայաստան է հասնում Վրաստանի տարածքով, և գազի տարանցման դիմաց ռուսները վարձահատույց են լինում ոչ թե փողով, այլ նույն այդ բնական գազով:
Բայց քանի որ այսօր Ադրբեջանի նախագահը պաշտոնական այցով Թբիլիսիում է, կայքը փափագում է նրա բերանով վերջին` «մահացու» հարվածն հասցնել Կալաձեին: Նախ մեջբերվում է Ալիևի այն պոռոտախոսությունը, թե Ադրբեջանն առաջիկա 100 տարում ի վիճակի է գազով ապահովել հարևան երկրները և… Եվրոպայի պետությունները:
Ոգևորված կայքը Կալաձեի վարած բանակցությունն ու դրան հաջորդած հիմնականում ադրբեջանական աղմուկ- աղաղակը անվանում է վրացի նախարարի «խայտառակությունը» և հեգնանքով նշում, որ այլ պետություններում նախարարը նման վրիպման դեպքում կարող էր պորտֆելից զրկվել:
Սակայն ադրբեջանական կայքն ավելի շատ զայրացել է, որ այս օրերին Վրաստանից /Թբիլիսիից/ բացակայում է նախկին վարչապետ Բիձինա Իվանիշվիլին, ով, ինչպես հայտնի է, «Գազպրոմի» 1 տոկոս բաժնեմասի սեփականատերն է: Կայքը խանդով հիշեցնում է, որ ընդամենը մի քանի օր առաջ, երբ Թբիլիսի էր այցելել Հայաստանի նախագահը, Իվանիշվիլին անթաքույց սիրալիրությամբ շփվում էր նրա հետ: Եվ անմիջապես հորինվում է ադրբեջանական վարկածը` իբր ոչ թե Իվանիշվիլին է խուսափել Ալիևի հետ հանդիպելուց, այլ Ադրբեջանի նախագահը չի կամեցել տեսնել Վրաստանի նախկին վարչապետին, ում կայքն անվանել է «բազմադեմ» գործարար քաղաքական գործիչ, ով ասում է մի, անում` մեկ այլ բան:
Ահա այս վերջին եզրակացությամբ փոքր- ինչ հանդարտվելուց հետո ադրբեջանական կայքը ձեռնամուխ է լինում Վրաստանի փոխվարչապետ և էներգետիկայի նախարար Կալաձեի մասնագիտական ունակությունների քարկոծմանը, ինչն ուղղակի անթույլատրելի բան է միջազգային, այն էլ հարևան երկրների հարաբերությունների պրակտիկայում: «Գլուխը քարը»,- երևի մտքում ասում են վրացի գործընկերները` ադրբեջանական կայքի արտառոց պահվածքի գնահատականը հետաձգելով մինչև հախագահ Ալիևի այցի ավարտը:
1
2
3
4
5
2
3
4
5
1
2
3
4
5
