Ի՞նչ անակնկալ է պատրաստել Արամեն. փակագծերը բացում է երգչի պրոդյուսերը
Վերջին շրջանում երգիչ Արամեն պարբերաբար նոր լուսանկարներ է տեղադրում իր սոցիալական էջերում՝ ակնարկելով, որ շուտով անակնկալ է մատուցելու իր երկրպագուներին: Life.panorama.am-ը սպասվելիք անակնկալի մանրամասները ճշտելու նպատակով կապ հաստատեց երգչի պրոդյուսեր Արտյոմ Հակոբյանի հետ, ով տեղեկացրեց, որ Արամեն հավանաբար այս ամսվա վերջին նոր տեսահոլովակ կներկայացնի. ««Դեպի երկինք» կոչվող երգի հիման վրա նկարահանել ենք տեսահոլովակ, որի ռեժսիորն է Սյումա Կոդաբաշյանը:
Նկարահանումները արդեն ավարտված են եւ այժմ այն գտնվում է մոնտաժային փուլում: Թե երբ այն կներկայացնենք հեռուստադիտողի դատին, չեմ ուզում հստակ ժամկետներ նշել, միայն կասեմ, որ ըստ նախնական որոշումների, հավանաբար այս ամսվա վերջին այն պատրաստ կլինի,- նշեց նա ու ընդգծեց, որ նոր երգի խոսքերի հեղինակը Ավետ Բարսեղյանն է, իսկ երաժշտությանը՝ Արսեն Գրիգորյանը: Պրոդյուսերը փակագծերը շատ բաց չանելով՝ պատմեց երգի այլ մանրամասներ. «Այս երգը սիրո մասին չի լինելու, այն ավելի շատ հոգեվիճակ է»,- նշեց նա:
Անդրադառնալով Արամեի գործունեությանը՝ Արտյոմ Հակոբյանը նշեց, որ երգիչը հաճախ է բացակայում երկրից. «Այո, Արամեն հաճախակի է մեկնում հյուրախաղերի, ընդամենը մի քանի օր է ինչ վերադարձել ենք, եւ արդեն դարձյալ հրավերներ կան»,- պատմեց Արտյոմ Հակոբյանը:
Պրոդյուսերը հավաստեց, որ երգիչը ակտիվորեն աշխատում է նոր երգերի վրա, եւ բացի նախատեսվելիք տեսահոլովակից, աշնանը եւս Արամեն մեկ այլ տեսահոլովակով հանդես կգա. «Այս տարվա ընթացքում դեռ շատ նորություններ կլինեն, պարզապես ամեն բան պետք է արվի հերթականությամբ»,- շեշտեց Արտյոմը:
Արամեի պրոդյուսերը հայտնեց նաեւ, որ այս տարի մենահամերգ երգիչը չի ունենա: Իսկ խոսելով եւ հետաքրքվելով Հայաստանում կազմակերպվելիք համերգային ծրագրերից, որոնցում Արամեին խիստ հազվադեպ կարելի է տեսնել՝ Արտյոմ Հակոբյանը պարզաբանեց պատճառները. «Արամեն հիմնականում Հայաստանում կազմակերպվելիք համերգներին չի մասնակցում, քանի որ միտք ունենք հաջորդ տարի մեծ համերգով հանդես գալու: Բացի այս, հետաքրքիր առաջարկները ընդունվում են, բայց խնդիրը նրանում է, որ հետաքրքիր առաջարկներ չկան, իհարկե, խոսքը չի գնում պետական միջոցառումների մասին, որովհետեւ Արամեն էլ գրեթե բոլոր երգիչների նման մասնակցում է դրանց»,- զրույցը եզրափակելով շեշտեց Արտյոմ Հակոբանը:
1
2
3
4
5
1
3
5
3
4
5
