Թուրքիան պետք է հաշտվի սեփական անցյալի հետ. Արամ Առաջինի հարցազրույցը New York Times-ին

Tert.am-ը գրում է.

Մեծի Տանն Կիլիկիո կաթողիկոս Արամ Առաջինը հեղինակավոր New York Times թերթի հետ զրուցել է Թուրքիայի Սահմանադրական դատարան ներկայացված հայցի մասին, որի նպատակն է վերադարձնել Ցեղասպանության ժամանակ հայկական եկեղեցուց առգրավված կալվածքները:

«Այդ հայցն իրականում առաջին օրինական քայլն է, որի վերջնական նպատակն է վերադարձնել թուրքերի կողմից բռնագրավված հայկական կալվածքները»,-ասել է Արամ Ա-ն` նկատելով, որ «դատարանի կողմից հայցի մերժումն է՛լ ավելի մեծ սեպ կխրի Թուրքիայի ու 10 միլիոնանոց հայ համայնքի միջև»:

Տվյալ հրապարակման հեղինակ Ռիք Գլեդսթոունը նշում է, որ Արամ Առաջինն իր գործունեության զգալի մասն ուղղել է աշխարհում Հայոց ցեղասպանության մասին մարդկանց իրազեկմանը և տարբեր պետությունների կողմից այդ պատմական փաստի ճանաչմանը:

Գլեդսթոունը հիշեցնում է, որ ամերիկյան բազմաթիվ նահանգներ ճանաչել են Հայոց ցեղասպանությունը՝ չնայած, որ Սպիտակ տունը դեռևս այդպես չի վարվել: Այս կապակցությամբ հեղինակը մեջբերում է կաթողիկոսի հետևյալ խոսքերը. «Վստահ եմ, որ նախագահ Օբաման սրտի խորքում գիտակցում է, որ տեղի ունեցածը ցեղասպանություն էր»:

Գլեդսթոունի հետ զրույցում Մեծի Տանն Կիլիկիո կաթողիկոսը նշել է, որ նախքան հայց ներկայացնելն ինքը խորհրդակցել է 30 իրավապաշտպանի հետ, այդ թվում՝ նաև Թուրքիայից:

«Կարծում եմ՝ բուն Ցեղասպանության ճանաչման փաստից զատ անչափ կարևոր է, որ 100 տարի անց մենք շեշտը դնենք նաև փոխհատուցման հարցի վրա: Սա առաջին քայլն է իրավական դաշտում: Դրան կհաջորդեն բոլոր մեր եկեղեցիները, վանքերն ու եկեղեցական կալվածքները վերադարձնելուն ուղղված պահանջները: Այնուհետ կներկայացվի անհատների ունեցվածքը վերադարձնելու պահանջը: Մենք պետք է քայլ առ քայլ առաջ շարժվենք: Որևէ մեկը չի կարող վիճարկել այդ կալվածքների հայկական ծագումն ու պատկանելությունը»,-նշել է Արամ Առաջինը:

Եկեղեցու առաջատար փաստաբան Փայամ Ախավանը, ով ևս տվյալ գործում ներգրավված իրավաբաններից է, ամերիկյան պարբերականի հետ հեռախոսազրույցում հայտնել է, որ թուրքական դատարանի կողմից մերժում ստանալու դեպքում հայցը տեղափոխելու է Մարդու իրավունքների եվրոպական դատարան: