Ռուբեն Հայրապետյանը հանդես է եկել հայտարարությամբ

Հայաստանի ֆուտբոլի ֆեդերացիայի նախագահ Ռուբեն Հայրապետյանն այսօր հանդես է եկել պաշտոնական հայտարարությամբ, որով, կարելի է ասել, պատասխանել է «Հայաստանի առաջին ճակատ» ֆան շարժման պահանջներին.

«Ուրախությամբ տեղեկացա, որ ՖԱՖ կոչվող խմբակը պահանջատիրական խնդիրներով է սկսել հանդես գալ, բայց զարմացա, որ պահանջատիրությունը կապված է Հայաստանի ազգային հավաքականի եւ Հայաստանի ֆուտբոլի ֆեդերացիայի հետ: Ես կարծում էի, որ ՖԱՖ կոչվող խմբակը պահանջատիրական հակումներ կարող է ունենալ օրինակ, ասենք Իտալիայի ազգային հավաքականի կամ Իտալիայի ֆուտբոլի ֆեդերացիայի նկատմամբ:

Բոլորն են հիշում, թե ինչ ջերմությամբ ու մտահոգությամբ էին նրանք երկրպագում, օրինակ՝ Իտալիայի ազգային հավաքականին: Ընդհանրապես ՖԱՖ կոչվող խմբակը մինի շոուներ կազմակերպելու մեծ փորձ ունի, բայց Հայաստանի ազգային հավաքականի համար վճռորոշ պահերին օտար երկրների հավաքականներին երկրպագելու մասով:

ՖԱՖ կոչվող խմբակը լավ կլինի, որպեսզի գիտակցի, որ Հայաստանի հավաքականն ունի հարյուր հազարավոր հավատարիմ երկրպագուների բանակ ինչպես Հայաստանում, այնպես էլ ամբողջ աշխարհում, որոնք իսկապես Հայաստանի ազգային հավաքականի եւ հայկական ֆուտբոլի կողքին են ամեն պարագայում: Նրանք իրենց չեն ծառայեցնում տարբեր շահերի, ոչ մաքուր հանձնարարություններ չեն կատարում, հավաքականն ու ֆուտբոլը չեն ծառայեցնում իրենց մանր ամբիցիաներին: Նրանք միշտ եւ հատկապես հավաքականի համար վճռորոշ պահերին մեր ազգային հավաքականի հետ են եւ մենք ամեն ինչ անելու ենք, որ մեր հավաքականը վերագտնի իրեն արժանի խաղը:

Հայաստանի ֆուտբոլի ֆեդերացիան եւ ես անձամբ, բազմիցս ենք արտահայտել մեր երախտագիտությունը մեր հավատարիմ հարյուր հազարավոր երկրպագուներին: Մենք ամեն ինչ անելու ենք, որպեսզի մեր ազգային հավաքականը նրանց վերադարձնի իրենց նվիրումը: Հայաստանում եւ արտերկրում Հայաստանի ազգային հավաքականի երկրպագուների բազմաթիվ կազմակերպություններ կան, որոնց նաեւ շնորհակալ ենք իրենց աշխատանքի, դիտողությունների եւ խորհուրդների համար: Որեւէ խմբակի իրավունք չի տրված խոսել ազգային հավաքականի բոլոր երկրպագուների անունից:

ՖԱՖ կոչվող խմբակին խորհուրդ կտամ զբաղվել տուրիստական գործունեությամբ եւ տոմսերի առք ու վաճառքով: Դա ավելի լավ է ստացվում» – նշված է Ռ. Հայրապետյանի հայտարարությունում:

Հիշեցնենք, որ սույն տարվա հոկտեմբերի 16-ին ՖԱՖ-ի ներկայացուցիչները երեք պահանջ էին ներկայացրել ՀՖՖ նախագահ Ռուբեն Հայրապետյանին, որի պատասխանները ստանալու համար տվել էին մեկ ամիս ժամանակ:

Աղբյուրը` Shabat.am