Բելգիացի բժիշկները կազմակերպել են «ամոթի միջանցք» հիվանդանոց այցելած վարչապետի համար

Բելգիայի առաջատար հիվանդանոցներից մեկի բժիշկները կազմակերպել են «ամոթի ու քամահրանքի միջանցք» թագավորության վարչապետ Սոֆի Վիլմեսի համար, որը կիրակի այցելել էր այդ բուժհաստատություն անձնակազմին բարոյապես սատարելու համար։ Կադրերը վկայում են, որ բժիշկներն ու բուժքույրերը շարք էին կանգնել հիվանդանոց տանող ճանապարհին, եւ երբ ժամանել էր վարչապետի շարասյունը, մեքենաներին մեջքով էին թեքվել իրենց վրդովմունքը ցուցաբերելու նպատակով առ այն, թե ինչպես են Բելգիայի իշխանությունները վերաբերվում առողջապահության համակարգին պանդեմիայի պայմաններում, հաղորդում է ՏԱՍՍ-ը։

Ընդհանուր առմամբ ակցիայում մասնակցել է շուրջ 120 բժիշկ, բուժքույր, համակարգի աշխատակից։ «Բժիշկները պնդում են ֆինանսական փոխատուցում վճարելու կամ աշխատավարձը բարձրացնելու ուղղությամբ վերջին ամիսների ծանր աշխատանքի արդյունքում։ Բացի այդ, նրանք վրդովվել են, քանի որ կառավարությունը հանձնարարել էր պարտադիր հավելյալ աշխատել անհրաժեշտության դեպքում։ Մեր բժիշկներն ու բուժքույրերն առանց այն էլ ավելի շատ են աշխատում, եւ հարկադրական միջոցները միայն վանում են»,-այտարարել է բժիշկների արհմիության ներկայացուցիչ Դիրք Վան Օվերթվելդթը։

Հիվանդանոցում լրագրողների առջեւ ելույթ ունենալիս Վիլմասն իր հերթին հայտարարել է, որ առողջապահության հատվածն ունի վերակառուցման եւ հավելյալ ֆինանսավորման կարիք։ Վարչապետը բուժանձնակազմին խոստացել է ե՛ւ նյութական, ե՛ւ հոգեբանական աջակցություն։ Իսկ Արհմիության ներկայացուցիչները հիշեցրել են, որ վարչապետը բյուջեի հարցերով նախարարի պաշտոնը զբաղեցնելու ժամանակ աշխատում էր բժշկական սարքավորումների ծախսերը կրճատելու շուրջ վերջին երեք տարիներին։

Բելգիայում բժիշկներին ուղղակի ֆինանսական աջակցություն ցուցաբերելու հարցը դիտարկվում էր ապրիլից, սակայն դեռեւս որեւէ լուծում չկա այդ գծով։ Երկրի կառավարությունը վերջին ամսվա ընթացքում իր բոլոր ջանքերը կենտրոնացրել էր բուժանձնակազմի համար արտերկրից դիմակներ ու պաշտպանիչ սարքավորում ձեռքբերելու շուրջ։

Մայիսի 17-ի դրությամբ՝ Բելգիայում կորոնավիրուսի հետեւանքով մահացել է ավելի քան 9 052 մարդ, հայտնաբերվել է վարակման 55 280 դեպք 11.5 միլիոն բնակչություն ունեցող երկրում։ Կորոնավիրուսի թեստերն այստեղ արվում են միայն հիվանդության սուր ախտանշանների դեպքում։